Нийслэлийн энэ жилийн автозам, дулааны шугамын сүлжээний засвар шинэчлэлийн ажил нэгэн зэрэг эхэлж байгаатай холбогдуулан нийслэлийн Засаг дарга бөгөөд Улаанбаатар хотын Захирагч Э.Бат-Үүл сэтгүүлчдэд хандан мэдэгдэл хийлээ. Хэвлэлийн бага хурал нийслэлийн Авто зам, Тээврийн газар, Замын цагдаагийн газар, Цагдаагийн газар зэрэг холбогдох албаны удирдлагууд оролцлоо.

Нийслэлд өнгөрсөн 2 жилийн хугацаанд автозамын бүтээн байгуулалтын ажлыг эрчимтэй өрнүүлж 80,7 км автозам шинээр ашиглалтад оруулж, 144,7 км автозамыг өргөтгөн шинэчилсэн. Энэ жил ч бүтээн байгуулалтын ажлыг урьд жилүүдийнхээс эрчимжүүлж, Улс, нийслэлийн төсвийн хөрөнгөөр 47,62 км автозам, 453 урт метр гүүрийг шинээр ашиглалтад оруулан 37,65 км автозам, 134 урт метр гүүрийг өргөтгөн шинэчлэх бөгөөд олон жилийн насжилттай зуслангийн замууд, дулааны шугам сүлжээг өргөтгөн шинэчлэх гэж байна. Нийт инженерийн дэд бүтцийн  1153 төсөл арга хэмжээ хэрэгжүүлэхээс хамгийн өргөн хүрээнд хийгдэх ажил нь Улаанбаатар хотын дулаан хангамжийн 3А,Б,В гол шугамыг ф600\500 болгон өргөтгөх ажил юм. Уг ажлыг  2015 оны 06-р сарын 07 ны өдрөөс эхлэн 2015 оны 08-р сарын 16 өдөр хүртэл хийж гүйцэтгэхдээ Энхтайвны өргөн чөлөөний Төв шуудангийн уулзвараас баруун  4 замын уулзвар  хүртэлх замыг 3 үе шаттайгаар хааж зам засвар, шугам хоолой солих ажлыг хийхээр бэлтгэж байна.

1-р үе: Төв шуудангийн уулзварын баруун талаас Цэцэг төвийн уулзварын зүүн тал хүртэл замын зорчих хэсэг 2015 оны 06 дугаар сарын 07-ны өдрөөс 06 дугаар сарын 25-ны өдөр хүртэл хугацаагаар хаагдахад замын хөдөлгөөнийг тухайн 2 уулзварт хааж Цэцэг төвийн  уулзвараас 1-р сургуулийн уулзвар   хүртэл нэг чигийн хөдөлгөөнд оруулан Сөүлийн гудамж, Сүхбаатарын гудамж бага тойруугаар хөдөлгөөнийг задлан Чингисийн өргөн чөлөөнд нэмэлт түр гэрлэн дохио байрлуулан замын хөдөлгөөнийг зохицуулахаар төлөвлөж байна.Баруунаас ирэх нийтийн тээврийн автобусыг Сөүлийн гудамжаар оруулан Энхтайвны өргөн чөлөө уруу зүүнээс ирэх нийтийн тээврийн автобусыг Сүхбаатарын гудамжаар оруулан Чингисийн талбайн баруун талд 2 автобусны зогсоол түр байгуулан иргэдэд үйлчлэхээр төлөвлөсөн байна.

2-р үе: Цэцэг төвийн уулзвараас УИДэлгүүрийн уулзварыг 2015 оны 06 дугаар сарын 25-наас 07 дугаар сарын 09-ны өдөр хүртэл хугацаанд авто замыг  хаахад Цэцэг төвийн уулзвараар хөдөлгөөнийг хойш урагш эргүүлэн Сөүлийн гудамж Худалдааны гудамж, Баруун сэлбийн гудамжаар хөдөлгөөнийг задлан зохицуулахаар төлөвлөсөн ба нийтийн тээврийн автобусыг мөн замуудаар зорчуулахаар төлөвлөсөн.

3-р үе: Улсын Их дэлгүүрийн баруун талаас Баруун 4 замыг 2015 оны 07 дугаар сарын 14-ний өдрөөс 08 дугаар сарын 14-ны өдөр хүртэл хугацаанд зам хаагдахад Баруун сэлбийн гудамж, Жуулчны гудамж, Сөүлийн гудамжаар хөдөлгөөнийг нэвтрүүлэн Жуулчны гудамжийг зүүнээс баруун тийш нэг чигийн хөдөлгөөнд оруулан замын хөдөлгөөнийг зохицуулахаар төлөвлөж байна.Тухайн замаар нийтийн тээврийн автобусыг зорчуулахаар төлөвлөсөн.

Улсын Драмын Эрдмийн театраас Төв шуудан хүртэлх дулааны шугамыг 1959 онд, Төв шуудангаас Баруун 4 зам хүртэлх шугамыг 1987 онд барьж, ашиглалтад оруулсан бөгөөд дулааны шугамын ачааллыг бууруулах, Гэр хорооллын дахин төлөвлөлтийн ажилтай уялдуулан нийслэлийн гэр хороололд дэд бүтэц татах боломжоор хангах зорилгоор уг ажлыг Хөгжлийн банкны санхүүжилтээр хийхээр шийдвэрлэсэн.

Энэ хэсгийн дулааны шугам сүлжээний ажил болон бусад автозамын бүтээн байгуулалт, АСЕМ-ийн бэлтгэл  ажилтай холбогдуулан 06 дугаар сарын 15-ны өдөөс эхлэн 08 дугаар сарын 15-ны өдрийг хүртэл 08-20 цагийн хооронд хотын төвийн хэсэгт автомашины улсын дугаарын тэгш, сондгойгоор хязгаарлан хөдөлгөөнд оролцуулах гэж байна. Дугаарын хязгаарлалт нь 7 хоногийн 6 өдөр буюу ням гарагаас бусад өдөр мөрдөгдөх бөгөөд Энхтайтаны өргөн чөлөө болон ЗЦГ-ын зүүн талын уулзвараас баруун тийш Нарны гүүрний зүүн доод уулзвар хүртэл, Баруун 4 зам, Гэсэр сүм, Залуучуудын өргөн чөлөө, Бага торйуу, ШУТИС-ийн уулзвар, МУБИС-ийн уулзвар, Буян ХХК-ны зүүн замуудаас дотогш замуудад үйлчилнэ. Ингэхдээ автомашины улсын дугаар тэгш тоогоор төгссөн тээврийн хэрэгсэлтэй жолооч тэгш тоотой өдрүүдэд, сондгой дугаараар төгссөн тээврийн хэрэгсэлтэй жолооч нар сондгой тоотой өдрүүдэд зорчих юм.

Энэ үеэр нийслэлийн Засаг дарга “Энэ жил нийслэлд автозам, дулааны шугам сүлжээний өргөтгөсөн томоохон ажлууд хийгдэнэ. Бид олон жилийн насжилттай зуслангийн замаа засч, төвийн дулааны шугам сүлжээгээ шинэчлэх гэж байна. Ингэснээр ирэх жилүүдэд дардан замаар зусландаа гарч, гэр хороололруу дэд бүтэц татан орон сууцжуулах ажлаа амжилттай үргэлжлүүлэх боломжтой болно. Тиймээс нийслэлийн эрхэм иргэд та бүхнийг энэ нөхцөл байдлыг харгалзан үзэж, бүтээн байгуулалтын ажлыг хурдацтай өрнүүлэхэд дэмжлэг үзүүлэхийг хүсч байна. Энэ нь мөн АСЕМ-ийн бэлтгэл ажил болно” хэмээн онцлон хэллээ.

Автозам, шугам сүлжээний засвар шинэчлэлийн ажлын хүрээнд хэсэгчлэн хаах замын талаар цаг тухай бүрд нь урьдчилан мэдээлнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.