Нийслэлийн Онцгой байдлын газраас жил бүр Туул голд завьт эргуүл ажиллуулдаг.

Энэ нь усны ослоор амь насаа алдсан иргэдийн тоо буурахад үр дүнгээ өгсөн учир энэ жил дахин ажиллуулахаар болсон байна.

Ингэхдээ нийслэлийн Онцгой байдлын газрын дарга, Улаанбаатар хотын цагдаагийн газрын даргын хамтарсан удирдамжийн дагуу Аврах ангийн Эрэн хайх, аврах салбарын албан хаагчид автомашин, завь, бусад техник багаж хэрэгсэлтэйгээр маргаашнаас есдүгээр сарын 10 хүртэл завьт эргүүлүүд ажиллуулахаар болжээ.

Тэд Туул голын Гачууртын Хар усан тохойгоос Биокомбинатын гүүр хүртэл, моторт завь, сэлүүрт завиар иргэдийг голын усанд осолдохоос урьдчилан сэргийлж аюулгүй байдлыг хангах юм байна.

Урин дулааны улирал, аялал зугаалгын үе эхэлж байгаатай холбогдуулан нийслэлийн Онцгой байддын газраас иргэдийг голын эрэг хавиар зорчихдоо аюулгүй байдлын тэмдэг, тэмдэглэгээг мөрдөж, бага насны хүүхдийг хараа хяналттай байлгахыг онцгойлон анхаарууллаа.

Дашрамд дурдахад тус газарт он гарснаас хойш голын усанд автомашинтайгаа суусан тав, живсэн хоёр, мөс цөмөрсөн хоёр, шаварт суусан нэг, усанд осолдож амиа алдсан нэг дуудлага ирсэн байна.

Тухайлбал Хан-Уул дүүргийн XII хороо, Биокомбинатын гүүрийн доор, Туул голд хүн осолдсон гэсэн дуудлагыг өгснөөр нийслэлийн Аврах ангийн бүлэг Туул голд найман метрийн гүнд шумбаж Баянхонгор аймгийн харьяат 31 настай, эрэгтэйн цогцсыг олж гарган цагдаагийн байгууллагад хүлээлгэн өгсөн байна.