Улс төр, эдийн засгийн таагүй нөхцөл байдалд нийгэм бүхэлдээ дарагдан, бүүдгэрхэн байгаа энэ цаг үед орон нутагт тэр тусмаа Говь нутагт нэгэн сонирхолтой, гэрэл гэгээтэй үйл явдал, болсон тухай чимэгтэй мэдээллийг хүргэж байна.
Энэ талаар Говьсүмбэр аймгийн татварын хэлтсийн дарга Б.Наранбаатартай холбогдон тодруулга авлаа. Тэрээр “Нэг талаас улс орны бодит эдийн засаг буурсан, төсвийн хүндрэлтэй байгаа, нөгөө талаас орон нутгийн төсвийн хариуцлага, эрх хэмжээг нэмэгдүүлэх чиглэлтэй байгаа энэ цаг үед манай хэлтэс нь орон нутгийн удирдлага болон татвар төлөгчидтэйгээ идэвхитэй хамтран ажилласны үр дүнд өнгөрсөн 2014 оны хувьд нийт төсөвт төвлөрүүлэх татварын орлогыг 1,6 тэрбум төгрөгөөр, орон нутгийн төсвийн орлогын төлөвлөгөөг 545.9 сая төгрөгөөр давуулан биелүүлж 2015 ондоо энэхүү амжилтаа бататган хадгалахыг эрмэлзэн ажиллаж байна даа” хэмээгээд миний сонирхолыг татсан шинэлэг ажлуудынхаа талаар дэлгэрэнгүй мэдээлэл өгсөнийг дор сийрүүллээ.
Өнгөрөгч 5-р сард Говьсүмбэр аймгийн Татварын хэлтсийн зүгээс улс орон даяар тэмдэглэн өнгөрүүлдэг Татвар төлөгчдийн өдрүүдийг тэмдэглэн өнгөрүүлэх арга хэмжээний хүрээнд ААНБ болон хувиараа бизнес эрхлэгч иргэддээ хандан татвар төлөгчиддөө талархаж буйгаа илэрхийлсэн, тэдэнд соёл, урлаг, оюун санааны бэлэг барихыг эрхэмлэсэн нэлээд сонирхолтой шинэлэг үйл ажиллагаанууд хэрэгжүүлжээ. Өөрөөр хэлбэл, тэд энэ удаад үргэлж хууль, журам ярьж залхаадаг байдлаас зайлсхийж, гэр бүл, хамт олон, өсвөр залуу үед чиглэсэн үйл ажиллагаанд илүү анхаарал тавьж, татвар төлөгчөө халамжлах, нийгмийн хариуцлагаа тал талдаа өндөржүүлэх үүднээс Флашмоб хөдөлгөөн, Мэргэжлийн зураач, уран бүтээлчдийн үзэсгэлэн, “Говийн загас” усан спортын тэмцээн, “Татвар төлөгчийн нэг өдөр” практик арга хэмжээ, “Татвар төлөгчийн амжилт бидний хөгжлийн үндэс” сэдэвт форум, “Одоо цагт хүргэж өгдөг галт тэрэг” сэдэвт хувь хүний хөгжлийн лекц, “Бидний мэддэг боловч мэддэггүй Монгол” сэдэвт видео перзентаци зэрэг эх орон, байгаль орчин, соёл, ёс уламжлал, хувь хүний хөгжлийн сэдвүүдээр “Багаар үр дүнтэй хамтран ажиллах нь бид бүгдийн амжилтын үндэс” гэсэн санааг тодотгосон олон талт арга хэмжээнүүд зохион байгуулж, байгаль орчныг нєхєн сэргээх, ойжуулалтын ажилд идэвхитэй оролцож нарсны 70 ширхэг 2 настай тарьц суулгажээ.
Мөн тус хэлтсийн дарга өөрийн шинээр боловсруулж эмхэтгэсэн Татварын төлөвлөгч, цагалбараар татвар төлөгч нартаа бэлэг барьсан байна. Энэ нь татварын хууль тогтоомжийг даган мөрдөх эхний алхам болох цаг хугацааны сахилга батыг хэрэгжүүлэх, эрсдэлээс урьдчилан сэргийлэх туслагч, гарын авлага болхоороо чухал ач холбогдолтой ажээ.
ГОВИЙН АНХНЫ ФЛАШМОБ ХӨДӨЛГӨӨН
Залуу үеийнхний үзэл бодол, нэгдмэл хүсэл эрмэлзлэлээ үггүйгээр илэрхийлэх орчин үеийн дэлхий нийтийн хандлага болоод байгаа ФЛАШМОБ хөдөлгөөн нь манай оронд, Улаанбаатар хотод өргөн дэлгэр нэвтэрч байгаа хэдий ч одоогоор орон нутагт хараахан хэрэгжиж нэвтрээгүй байгаа юм. Гэтэл манай орны хамгийн цөөхөн хүн амтай Говьсүмбэр аймагт, тус аймгийн Татварын хэлтсийн санаачилга, дэмжлэгээр "Өнөөдөр төлсөн таны татвар маргаашийн сайн сайхныг бүтээнэ" уриан дор орон нутгийн ЕБС -ийн 60 гаруй сурагчид ФЛАШМОБ хөдөлгөөнд нэгджээ. Орон нутагтаа анхдагч болох энэхүү ФЛАШМОБ хөдөлгөөний агуулга нь “хүүхэд залуу үеийнхний маань ирээдүйн сайн сайны төлөө хөрөнгө оруулалт хийж байгаа татвар төлөгч ах эгч нартаа илэрхийлж буй талархал бөгөөд нөгөө талаар улс орны эдийн засаг эмзэг байгаа энэ цаг үед ах, эгч, аав ээж нартаа хандан ногдсон татвараа цаг тухай бүрт нь шударгаар төлөхийг уриалж нэгдмэл зорилгын төлөө нэгэн зэрэг тэмцэх эрмэлзлэл юм” хэмээн зохион байгуулагчид нь тэмдэглэж хэллээ.
МЭРГЭЖЛИЙН ЗУРААЧ, УРАН БҮТЭЭЛЧДИЙН ҮЗЭСГЭЛЭН
Мөн тус хэлтэс нь Говьсүмбэр аймагт анх удаа орон нутгийн мэргэжлийн уран бүтээлчид, зураач урчуудтай хамтарсан уран бүтээлийн үзэсгэлэнг зохион байгуулан, иргэд, татвар төлөгчидөд соёл, урлаг оюун санааны бэлэг барьж орон нутагтаа уг шинэлэг арга хэмжээнийхээ анхдагч нь боллоо. Үзэсгэлэнд арван уран бүтээлчийн 95 бүтээл тавигдсан бөгөөд уран зураг, монгол зураг, мод, цаас, металл болон арьсан урлалын бүтээлүүдийг нэг дороос үзэх боломжыг бий болгосон нь олны талархалыг хүртсэн сонирхолтой арга хэмжээ байлаа.
ГОВИЙН ЗАГАС УСАН СПОРТЫН ТЭМЦЭЭН
Татвар төлөгчдийн өдрүүдийн нэгдсэн арга хэмжээний хүрээнд нийт татвар төлөгч иргэд, аж ахуйн нэгж байгууллагууд, бизнес эрхлэгчдийн дунд "ГОВИЙН ЗАГАС" нэртэй усанд спортын тэмцээн зохион байгуулсан нь орон нутагт, ялангуяа говь нутагтаа шинэлэг үйл явдал болсон байна. Тэмцээний гол агуулга, ач холбогдол, үр дүн нь нийт татвар төлөгчдийнхөө чөлөөт цагийг эрүүл, эрч хүчтэй, зөв боловсон өнгөрүүлэх, багын хамтын ажиллагааг идэвхжүүлэх замаар “Эрүүл мэнд, багаар ажиллах чадвар, хурд, тэвчээр, амжилт бол татвар төлөгчдийн маань хамгийн том баялаг бөгөөд энэ бүх шинж чанар нь татварын системд мөн адил оршин байдаг” гэсэн санааг эрч хүчтэй, гэгээлэг өрсөлдөөнт хэмнэл дунд татвар төлөгчиддөө ойлгуулж мэдрүүлсэн явдал байсан байна.
Тэмцээнд 2 эрэгтэй, 2 эмэгтэй бүгд 4 хүний бүрэлдэхүүнтэй 10 баг буюу нийт 30 гаруй байгууллагын 40 тамирчин усанд сэлэлтийн 2 төрөл болон усан поло тэмцээнээр хурд хүч, авхаалж самбаагаа сорьж, багуудын хооронд болсон эрч хүчтэй гал гарсан тоглолтуудыг Онцгой байдлын газрын баг тэргүүлж, 2-р байранд “Хос Ану Жин” ХХК-ны баг, 3-р байр Эрүүл мэндийн газрын баг шалгарсан байна.
"Татвар төлөгчийн нэг өдөр" арга хэмжээ: "Татвар төлөгчийн нэг өдөр" буюу татвар төлөгч иргэд, аж ахуй нэгжийн төлөөлөл “ББОГ” ХХК захирал М.Рашбаа, “Буянгого” ХХК захирал Х.Алтанцэцэг нар татвар хураагчаар 1 өдөр ажиллаж, хэлтсийн үйл ажиллагаа, бүтэц зохион байгуулалттай танилцан улс, орон нутгийн төсвийг бүрдүүлэх үйлсэд гар бие оролцож ажиллав.
“Хамтдаа” тэмцээн: Баянтал сумын хүүхэд багачуудыг эцэг эхтэй нь хамт хөгжөөнт уралдаан тэмцээнд оролцуулах замаар татварын тухай ойлголтыг гэр бүлийн гишүүдэд нэгэн зэрэг хүргэх зорилготой “ХАМТДАА” цэнгээнт тэмцээн зохион байгуулж, 10 гэр бүлийг оролцуулж 100 орчим хүнийг хамруулжээ.
“Нэг минут нэг зуун мянга” тэмцээн: Шивээговь сумын иргэдэд татварын тухай ойлголт, мэдлэг мэдээллийг дээшлүүлэх зорилгоор “НЭГ МИНУТ НЭГ ЗУУН МЯНГА” цэнгээнт тэмцээн зохион байгуулж, 7 байгууллагын 10 төлөөлөл амжилттай оролцож, 80 гаруй татвар төлөгчийг хамруулжээ.
"ТАТВАР ТӨЛӨГЧИЙН АМЖИЛТ, БИДНИЙ ХӨГЖЛИЙН ҮНДЭС" ФОРУМ
Аймгийн Санхүү төрийн сангийн хэлтэс, Худалдан авах ажиллагааны алба, Хөдөлмөрийн хэлтэс, үйлдвэр хөдөө аж ахуйн газар, Худалдаа аж үйлдвэрийн танхимын салбар зэрэг байгууллагуудтай хамтран 200 гаруй татвар төлөгчийг хамруулсан "Татвар төлөгчийн амжилт, бидний хөгжлийн үндэс" сэдэвт нээлттэй хэлэлцүүлэг зохион байгуулжээ. Форумд ТЕГ-ын Татвар хураалт удирдлага арга зүйн газрын ТУБ Ш.Энхжаргал уригдан ирж Үндэсний татварын албаны бодлого, зорилтын талаар мэдээлэл өгч, Монголын боловсрол компаний захирал, орчин үеийн Transpoem урсгалын үндэслэгч Н.Наранбаатар “Одоо цагт хүргэж өгдөг галт тэрэг” сэдэвт хувь хүний хөгжлийн сонирхолтой лекцээр, “Миний Монгол Экспедиц” -ийн үүсгэн байгуулагч, “Өв соёлын эрэл хайгуулчид” ТББ -ын тэргүүн Б.Батзориг Монгол орны байгалын үзэсгэлэнт тогтоц, баруун зүүн хязгаарын ард иргэдийн амьдрал ахуйн тухай сонирхолтой баримтат видео танилцуулгаар тус бүр сонирхолтой илтгэл тавин бэлэг барьжээ
Ийнхүү Говьсүмбэрчүүд Флашмоб бүжиглэж, усанд загас шиг сэлж, уран зургийн үзэсгэлэн, болон нээлттэй форум зохион байгуулж эрч хүчтэй хийж бүтээж байгаа ньсайшаалтай санагдлаа.
Д.Ундрах /24tsag.mn/
