Монголчуудын амьдрал хэтэрхий дордсоны илэрхийлэл үү эсвэл хулгайн гэмт хэрэг нарийсч байгаан шинж үү хүний санаанд оромгүй гэмт хэргүүд үйлдэгдэх болсоныг онцлох нь зүйтэй биз ээ.
Тодруулбал, дөнгөж тарьсан суулгацыг иргэд ихээр хулгайлах болсон байна. Өнөөдрийн байдлаар 3000 гаруй нь хайлаас, 20 гаруй гацуур хулгайд алдагдчихаад байгааг албаныхан онцоллоо.

Уг нь энэ жил Улаанбаатар хотын 92 гудамж цэцэрлэгт ногоон байгууламжийн тарилт, арчлалт хамгаалалтын ажлыг хийхээр төлөвлөсөн бөгөөд 5.8 тэрбум төгрөг зарцуулахаар төсөвлөсөн. Гэвч тарьсан суулгацыг нь эхнээс нь хулгайлж эхэлснийг нийслэлийн иргэдийн гайхширлыг төрүүлээд байгаа юм.

Тухайлбал, Сонгинохайрхан дүүргийн 19 дүгээр хорооны иргэн Л өнгөрсөн сарын 15-16-нд шилжих шөнө нийтийн эзэмшлийн талбайгаас нахиалж эхэлсэн 350 мод хулгайлж байгаад цагдаад баригджээ. Түүнд эрүүгийн хэрэг үүсгэн шалгаж байгаа аж. Мөн байрны өмнө тарьсан модыг ганц, нэгээр нь хулгайлах хэрэг тасрахгүй байгааг албаны эх сурвалж мэдээллээ.

Мөн мод хулгайлах гэж байсан хоёр, гурван этгээдийг үйлдэл дээр нь барьжээ.

Ер нь тавдугаар сард мод тавиад эхлэхээр зарим ийм үйлдлүүд тасардаггүй талаар эх сурвалжууд хэлж байна. Гэтэл тэд нэгэнт нахиалчихсан модыг хулгайлж, өөр газар суулгалаа гэхэд дахиад ургахгүй гэдгийг ойлгохгүй байгаа нь харамсалтай.

Өөрт ч хэрэггүй бусдыг нь хорлосон энэ үйлдлээ ухамсарлаж ийм төрлийн хулгай хийдэг иргэд анхаарах хэрэгтэй байна.

Монголчууд модны мөчир тасдахыг цээрлэдэг. Гэтэл нахиалж, амьдарч эхэлж байгаа нялх модыг хуу татан хулгайлж нүгэл үйлдэгсэд олон болсоныг юу гэж ойлгох вэ?.

Арга ядсан хууль хүчнийхэн хэрэв  нахиалсан мод, суулгац хулгайлж байгаа хүнтэй таарвал цагдаагийн байгууллагад мэдээлэл өгөхийг иргэддээ уриалаад явж байна.

Нийслэлийн тохижилт цэцэрлэгжүүлэлтийг хариуцсан “Нийтийн үйлчилгээний Улаанбаатар нэгтгэл”-ээс л гэхэд энэ асуудлаас болж Нийслэлийн цагдаагийн газрын даргад хандаж, албан бичиг явуулсан байна. Харин Нийслэлийн цагдаагийн газраас дүургүүдийн цагдаагийн хэлтэс рүү чиглэл өгч, дээрх нэгтгэлтэй хамтран ажиллаж байгаа аж.

Д.Дуулим