Охидыг зэрлэгээр хөнөөж, 25 жилийн хорих ял сонссон Б.Идэрзаяа анхан шатны шүүхийн шийдвэрийг эсэргүүцэн, Нийслэлийн давж заалдах шатны шүүхэд хандсан.

Тэгвэл түүний гомдлыг Нийслэлийн шүүх өнөөдөр хэлэлцэхээр болжээ.

Уг шүүх хуралд Б.Идэрзаяа өөрийн биеэр оролцох хүсэлтэй байгаагаа илэрхийлж, шинэ баримт дэлгэхийг хүсчээ. Харин түүний гаргасан хүсэлтийг шүүх хүлээж авах нь одоогоор тодорхойгүй байгаа бөгөөд түүний дэлгэнэ хэмээгээд байгаа баримтыг шүүх авч хэлэлцэх эсэх нь эргэлзээтэй байгаа аж.

Учир нь Нийслэлийн давж заалдах шатны шүүх хуралд шинэ баримт дэлгэдэггүй, анхан шатны шүүхийн шийдвэрлэсэн хэргийг бүхэлд нь хянаж, хуулийг хэрхэн зөв хэрэглэж, шийдвэр гаргасан эсэхийг хэлэлцдэг юм байна.

Энэ талаар Б.Идэрзаяагийн өмгөөлөгч н.Бадмаараг “Бидэнд хэд хэдэн баримт бий. Хамгийн чухал нь энэ хэргийг үйлдсэн хүмүүсийг  мэднэ гэх хүмүүс бидэнд хандсан. Улмаар энэ мэдээллээ 50 сая төгрөгөөр зарна гэсэн.

Энэ хүн Б.Идэрзаяагийн гэр бүлийнхэнтэй холбогдож, “Би энэ гэмт хэргийг үйлдсэн хүмүүсийг мэднэ” гэх утга бүхий албан ёсны тодорхойлолт гаргаж өгсөн. Тэр хүн 461-р ангид хоригдож байгаа хоригдол” хэмээн мэдээлсэн байна.

Ямартай ч Баянзүрх дүүргийн IX хорооны нутаг дэвсгэр, Шар хадны эцэс Хар хошуу хэмээх газар 19-20 насны охидыг онц хэрцгийгээр хөнөөсөн аймшигт хэрэг үйлдсэн гэгдэж буй  Б.Идэрзаяагийн хэрэгт давж заалдах шатны шүүх ямар  шийдвэр гаргахыг эргэн мэдээлнэ.