“Welcome to Mongolia-2015” олон улсын балетын наадам энэ сарын 18,19-ны өдөр манай улсад зохион байгуулагдах гэж байна.

Энэ талаар өнөөдөр МУГЖ Д.Алтанхуяг болон тус наадамд оролцох уран бүтээлчид мэдээлэл хийлээ.

Монголын балетын хөгжил сангаас хоёр дахь удаа зохион байгуулж буй энэхүү наадамд АНУ, Гүрж, Франц, Испани, Япон, Казакстан, Тайвань улсын нэртэй шилдэг балетчид оролцох юм байна.

Монгол Улсаа олон улсад сонгодог урлагаар дамжуулан сурталчлах, Монголын балетын үзэгчдэд өнөө үеийн балетын хөгжлийн шинэ төрх, хөгжлийг ойртуулж, мэдрүүлэх зорилго бүхий "Welcome Mongolia-2015” наадмын бэлтгэл хэдийнэ эхэлжээ.

Тус наадмын продюсерээр МУГЖ Д.Алтанхуяг ажиллаж байгаа бол дэлхийн шилдэг бүжигчидтэй ажиллаж, бүжиг дэглэх авъяасаараа нэг номерт тооцогдох балетчин, бүжиг дэглээч Фан И жүжгийг дэглэж байгаа аж.

Тэрбээр тоглолтын үеэр МУГЖ Д.Алтанхуягт зориулж тавьсан бүжгээ хамтран бүжиглэх юм байна.

Энэ талаараа Фан И “Д.Алтанхуягаас чөлөөтэй, эрч хүчтэй хөдөлгөөн мэдрэгддэг. Тиймээс би түүнд зориулж задгай өөрийнхөөрөө байх тийм л уран хөдөлгөөнтэй бүжиг дэглэсэн. Энэ маань үзэгчдэд таалагдана гэж найдаж байна” хэмээн өгүүлсэн.  

Тус наадам олон улсад танигдсан шилдэг бүжигчид сонгодог бүжгийн оргил бүтээлүүд болох "Хунт Нуур”,“Ромео Жульет”,“Камэллиа Хатапгай", Жорсар", “Травиата” зэрэг бүжгэн жүжгийн оргил хэсгүүдээс Монголын үзэгчдэд толилуулах юм байна. Тус наадам үзэгчдэд сонгодог урлагийн орчин үеийн өнгө аясыг мэдрүүлэх болно гэдгийг ч зохион байгуулагчид энэ үеэр онцлож байсан.

Наадамд оролцох жүжигчдийн дийлэнх нь манай улсад анх удаагаа ирж, Монголын тайзнаа гарах гэж байгаадаа сэтгэл хангалуун байна гэдгээ илэрхийлж байсан бол гуравдахь удаагаа ирж тоглох гэж байгаа Уитни Женсен  “Монгол Улс үнэхээр өдрөөс өдөрт хөгжиж байгаа нь нүднээ илт байна. Өмнөх жилүүдээсээ улам бүр хөгжиж, балетын урлагийг ойлгодог хүмүүс улам олон болсон мэт санагдаж байна. Монгол Улсын тайзнаа энэ олон нэртэй уран бүтээлчидтэй гарах гэж байгаадаа үнэхээр их баяртай байна” хэмээсэн.

Дашрамд сонирхуулахад энэхүү наадмын бүрэлдэхүүн Монгол Улсад тоглосныхоо дараа арлын Япон улсыг зорьж, тэнд тоглолтоо тавих аж.