Сэлэнгэ аймгийн Мандал сум дахь сум дундын цагдаагийн хэлтсээс “Олон нийт-цагдаагийн хамтын ажиллагаа”-ны хөтөлбөрийн хэрэгжилтийг хангах, Гэмт хэргээс урьдчилан сэргийлэхэд иргэд, олон нийтийн оролцоог нэмэгдүүлэх, идэвхижүүлэх, хамтын ажиллагааны ач холбогдол, хэрэгцээ шаардлагыг ойлгуулах, Мандал сум дахь Үндэсний аюулгүй байдлыг хангах чиг үүрэг бүхий байгууллагуудын үйл ажиллагааг сурталчилах үүднээс Сумын Гэмт хэргээс урьдчилан сэргийлэх салбар зөвлөл, Засаг даргын тамгын газартай хамтран “Олон нийт-цагдаагийн хамтын ажиллагаа” арга хэмжээг зохион байгуулж ажиллалаа.
Энэ үйл ажиллагаанд Мандал сум дахь сум дундын Цагдаагийн хэлтэс, Шүүхийн шийдвэр гүйцэтгэх хорих 413-р анги, хорих 433-р анги, Онцгой байдлын гал унтраах 19-р анги оролцсон юм.
Тус цагдаагийн хэлтсээс байгууллагын үйл ажиллагааг сурталчилж, иргэдэд хууль эрх зүйн талаар зөвлөгөө өгч, 200 иргэнээс санал хүсэлтийг хүлээн авч, “Бид насанд хүрээгүй хүүхдийг хамгаална”, “Зам тээврийн ослоос урьдчилан сэргийлэх”, “ Согтууруулах ундааг зөв боловсон хэрэглэх”, “ Орон байрны хулгайн гэмт хэргээс урьдчилан сэргийлэх”, “Гэр бүлийн хүчирхийлэлээс урьчдилан сэргийлэх”, “ Мал хулгайлах гэмт хэргээс урьчилан сэргийлэх”, “ Хар тамхи мансуурах бодис хэрэглэх нь таны эрүүл мэндэд хортой” зэрэг 600 санамж, сэрэмжлүүлгийг иргэдэд тараажээ. Мөн гэмт хэрэг, зөрчлөөс урьдчилан сэргийлэх ажилд идэвхи, санаачлагатай ажилладаг байгууллага, иргэнийг шагнаж урамшуулах үйл ажиллагааг зохион байгуулсан гэж тус хэлтсээс манайд мэдээллээ.