Үндэсний их баяр наадмын нээлт хаалтын ёслолын ажиллагаа баярын гол үйл ажиллагаа байдаг.

Тиймээс ч уг арга хэмжээнд ихээхэн ач холбогдол өгч, хөрөнгө мөнгө, цаг хугацаа зарцуулдаг.

Өмнөх жилүүдэд  үндэсний их баяр наадмын нээлт хаалтын ёслолыг төрийн соёрхолт, гавъяат жүжигчин Д.Сосорбарам найруулан наадамчин олныг цэнгүүлдэг байсан.

Тэгвэл энэ жил тэрбээр уг ажлаас чөлөөлөгдсөн байна. Түүний найруулсан ёслолын ажиллагаа жил бүр л олны анхаарлыг татаж, өөр өөрийн онцлогийг илтгэдэг байсан ч ямар учраас энэ жилийн тоглолтыг найруулахаас татгалзсан нь одоогоор тодорхойгүй байгаа юм.

Харин энэ жил наадмын урлагийн тоглолт, ёслолын ажиллагааг “Номадс” компанийн ерөнхий захирал, Наадмын соёл урлагийн салбар хорооны ерөнхий продюссер М.Есөнмөнх продюссрлож, найруулагчаар Цэргийн дуу бүжгийн эрдмийн чуулгын найруулагч Ч.Ганхуяг, Улсын дуурь бүжгийн эрдмийн театрын найруулагч Н.Болд нар зохион байгуулахаар болжээ.

Тэд наадмын өдрүүдийн соёл урлагийн тоглолтын үзүүлбэрт гадаадын нэр хүндтэй дуучдыг урьж тоглуулах тухай яриа олны дунд дэлгэгдэж багагүй шүүмжлэлийг хүртээд байгаа ч асуудал хэрхэн шийдэгдсэн нь бас л тодорхойгүй байгаа юм. Ямартай ч 93 сая 60 мянган төгрөг зарцуулах төрийн ёслол, хүндэтгэлийн арга хэмжээ наадамчин олны сэтгэлд нийцэж, талархалыг хүлээх эсэхийг тэдний найруулсан үйл ажиллагааг л илтгэх байх.

Энэ жил наадмын үйл ажиллагааны зардлыг багагүй хувиар нэмсэн. Тодруулбал Засгийн газрын нөөц хөрөнгөөс 1.9 тэрбум, нийслэлийн нөөц хөрөнгөөс 500 сая, наадмын үйл ажиллагааны орлогоос 370-аад сая төгрөг зарцуулахаар болсон. Харин энэхүү зардлыг задаргааг сонирхуулбал

Үндэсний бөхийн барилдаанд 85 сая 726 мянган төгрөг

Хурдан морины уралдаанд 227 сая 360 мянган төгрөг

Сур харваанд 83 сая 777 мянган төгрөг

Шагайн харваанд 28 сая 190 мянган төгрөг

Урлаг, соёлын арга хэмжээнд 812 сая төгрөг

Аварга адуучин шалгаруулахад 104 сая 455 мянган төгрөг

Төрийн ёслол, хүндэтгэлийн арга хэмжээнд 93 сая 60 мянган төгрөг

Хэв журам хамгаалахад 267 сая 42 мянган төгрөг

Тохижилт засвар, худалдаа үйлчилгээнд 769 сая 514 мянган төгрөг

Урилга хөтөлбөр, бусад зүйлс хэвлүүлэхэд 32 сая төгрөг

Бусад арга хэмжээнд 224 сая 796 мянган төгрөг

Хэвлэл мэдээлэл, сурталчилгаанд 18 сая 600 мянган төгрөг тус тус зарцуулахаар төлөвлөсөн байна.