МХЕГ-ын даргын зөвлөлийн хурлаар Оюу толгой ХХК-д хийгдсэн шалгалтын талаар хэлэлцлээ.

Оюу Толгой ХХК одоогийн байдлаар 136 байрилга байгууламжид цогц үйл ажиллагаа явуулж байгаа бөгөөд шалгалтад хамрагдсан объектуудаас 71 нь бага эрсдэлтэй, 4 нь дунд, 3 нь их эрсдэлтэй гэсэн дүгнэлтийг мэргэжлийн хяналтын байцаагчид гаргасан байна. 

Тухайлбал Оюу толгойн далд уурхайн хоёр цооногийн өргөгч механизм их эрсдэлтэй гэсэн ангилалд багтжээ. Уг өргүүр нь далд уурхай руу орж гарах ажилчдыг дээш доош нь зөөх зориулалттай юм байна. Гэвч энэ нь аюулгүй ажиллагаа хангахгүй байгаа тул яаралтай стандартын дагуу хэвийн горимд оруулахыг мэргэжлийн байгууллагаас анхааруулав.

Ажилчдынхаа нийгмийн асуудал ажиллах нөхцлийг дээд зэргээр хангадаг хэмээн цээжээ дэлдэх дуртай “Оюу толгой”-н удирдлагууд ажилчдынхаа амь насыг ингэж л дээсэн дөрөөн дээр тогтоон барьж байгаа нь үнэхээр харамсалтай.

Түүнчлэн шалгалтаар “Оюу толгой” ХХК-д хэмжилзүй хяналтын нэлээд олон зөрчил илэрсэн байна. Мөн уурхайн ажилтнуудын уурхайн бүсэд түр орон сууцад амьдруулж байсан нь ч илчлэгджээ.

“Оюу толгой” ХХК-ийн уурхайд өнгөрсөн онд гал гарч байсан. Харин мэргэжлийн байгууллагаас галын шалтгааныг тогтоосны дараа тус компанид хэрэгжүүлэх албан даалгавар өгчээ. Гэвч тэд зарим албан даалгаврыг өнөөг хүртэл биелүүлээгүй байгаа аж.

Тиймээс дээрх зөрчилтэй холбоотойгоор Оюу толгойд 92 заалт бүхий 2 албан шаардлага, 32 заалт бүхий 3 дүгнэлт, 16 заалт бүхий нэг зөвлөмж хүргүүлсэн байна. Мөн  1 сая 660 мянган төгрөгийн торгууль оногдуулжээ.

Түүнчлэн энэ мэтээр зөрчлөө арилгахгүй “том толгойлоод” байвал энэ удаагийн шалгалтаар илэрсэн бага, дунд эрсдэлтэй бүлэгт багтсан зөрчлийг их эрсдэлтэй хэмээн тооцож, арга хэмжээ авна гэдгийг ч албаны хүмүүс анхааруулсан юм.  

Ямартай хариуцлагатай уул уурхай хэмээн өөрсдийгөө магтах дуртай "Оюу толгой" ХХК мэргэжлийн байгууллагын шалгалтанд бүдэрч, хууль тогтоомжийг уландаа гишгэж байгаа нь илчлэгдлээ.

24tsag.mn