Нийслэлийн ногоон бүсэд үйл ажиллагаа явуулж буй хүүхдийн зуслангууд үүд хаалгаа нээж, хүүхдүүдээ хүлээж авч эхэлжээ.

Уг нь зургадугаар сарын эхнээс үйл ажиллагаагаа эхлүүлдэг хүүхдийн зуслангууд энэ жил улаанбурхан өвчний тархалтаас шалтгаалан 20 хоногоор хойшлож өчигдрөөс эхлэн амрагч хүүхдүүдээ хүлээж авсан байна.

Өчигдөр Нарс, Нарлаг, Янзага, Сансар, Галакси, Ундраа зуслангууд нээлтээ хийжээ. Харин үлдсэн зуслангууд ирэх даваа гарагт үүдээ нээх юм байна. Нийслэлийн ногоон бүсэд үйл ажиллагаа явуулж буй хүүхдийн зуслангуудад өнгөрсөн долоо хоногт шалгалт явуулсан бөгөөд шалгалтаар Сэлбэ зусланг ажиллуулахгүй байхаар  дүгнэлт гарчээ.

Энэ жилийн хувьд зуслангуудын хүүхэд амраах дундаж үнэ 175 мянган төгрөг байгаа бөгөөд зургадугаар сарын 4-ний өдрөөс Улаанбаатар чуулгын нэг давхарт зусланд амрах хүүхдүүдийг бүртгэж эхэлсэн байна.

Одоо ч бүртгэл үргэлжилж байгаа аж. Гэхдээ энэ жилийн хувьд халдварт өвчний тархалт их байгаа учраас эрүүл мэндийн үзлэгийг улам чангатгасан байна.

Тиймээс өмнө жилүүдэд иргэд бүртгэл хийлгэснийхээ дараа эрүүл мэндийн хуудсаа өгдөг байсан. Тэгвэл энэ жилээс иргэд хүүхдээ зусланд бүртгүүлэхээр ирэхдээ эрүүл мэндийн хуудсаа бөглүүлж авчрах хэрэгтэй гэдгийг холдбогдох албаны хүмүүс анхаарууллаа.

Эрүүл мэндийн хуудсыг child.gov.mn  эндээс татаж авах боломжтой юм. Мөн эрүүл мэндийн хуудсыг хувийн эмнэлгүүдээр бөглүүлэхгүй. Заавал өөрийн оршин суугаа дүүргийн эрүүл мэндийн нэгдлээр бөглүүлэн, тамгуулах ёстой аж. Иргэдийн хувьд дүүргийн эмнэлэг оочертой гэх шалтгаанаар хувийн эмнэлгээр тамга даруулах явдал байдаг. 

Тэгвэл энэ жилээс зөвхөн дүүргийнхээ эмнэлгээр л бөглүүлэх шаардлагыг тавьж эхэлжээ.