Энэ сарын 10-ны өдөр 8-9 цагийн үед гэртээ байсан хоёр хүү газ дэлбэрсний улмаас түлэгдсэн харамсалтай хэрэг гарсан.

Улмаар галд өртсөн хоёр хүүгийн биеийн байдал дааруу байгаа бөгөөд дүүгээ аварсан ахынх нь бие маш хүнд, яаралтай Солонгос улсыг зорьж хагалгаа хийлгэх шаардлагатай байгаа учир хүүгийн гэр бүлийнхэн өнөөдөр ард түмэндээ хандлаа.

Тэд ард түмнээсээ "Тусламжийн гараа сунгаж, хүүхдүүдийн минь амь насыг аврахад тус болооч ээ" хэмээн нулимас дуслуулан тусламж хүслээ.

Түүний эмчилгээний зардалд 350-400 сая орчим төгрөг шаардлагатай байгаа бөгөөд сайхан сэтгэлтэй ард түмэн, аж ахуйн нэгж байгууллагын буянаар одоогоор 70-аад сая төгрөг цугласан байна. Үүнээс 12 орчим сая төгрөгийг эмчилгээндээ зарцуулсан болохыг хүүгийн ээж М.Болортуяа өгүүлсэн. 

Мөн тэд хүүгийнхээ амь насыг аврахын тулд төрийн гурван өндөрлөг, УИХ-ын эмэгтэй гишүүдийн зөвлөлд хандаж, хүүгийн минь амийг амрахад туслаач ээ гэж захидал илгээжээ.

Харамсалтай хэргийн талаар эргэн сануулбал энэ сарын 10-ны өдөр 8-9 цагийн үед Налайх дүүргийн наймдугаар хороонд оршин суух Б.Амарбатын хоёр хүүг гэртээ байхад нь баллонтой газ дэлбэрч, гэр нь шатсан бөгөөд тухайн үед хүү гэрээсээ гарч хажуу айл  руугаа орилж дуудаад, гэртээ үлдсэн хоёрхон настай бяцхан дүүгээ аврахаар буцаж орсон байна. 

Ингэснээр дүүгийнхээ амь насыг аварсан хүү өнөөдөр гуравдугаар зэргийн буюу 80 хувийн түлэгдэлттэй, ухаан балартсан, маш хүнд байдалтай үхэлтэй тэмцэлдэн, Түлэнхийн төвийн Сэхээн амьдруулах тасгийн орон дээр шаналан хэвтэж байна.

Та бүхэн ХААН банкны 5018042275 тоот дансанд сэтгэлийн өглөгөө өргөх боломжтой юм.