Улсын Ерөнхий прокурорын туслах,  Гадаад Харилцаа Эрх Зүйн туслалцааны хэлтэсийн дарга Г.Ганзориг Ази Номхон Далайн бүс нутгийн  “Гэмт хэрэг үйлдэж олсон эд хөрөнгийг илрүүлэх, хураах” сэдэвт ээлжит 3 дахь хуралдаанд оролцлоо.

Хуралдаан БНСУ-ын Сөүл хотноо 2015 оны 6 дугаар сарын 16-наас 19-ны өдрүүдэд болсон бөгөөд Г.Ганзориг “Гэмт хэрэг үйлдэж олсон эд хөрөнгийг битүүмжлэх, хураах талаар Монгол Улсын хууль тогтоомж, олон улсын гэрээгээр хүлээсэн энэ үүргийн Монгол Улс дахь хэрэгжилт” сэдэвт илтгэл тавьж хэлэлцүүлжээ. Түүний илтгэлд дурдснаар, Солонгос улсад хууль бусаар казино байгуулсан гэмт хэрэг үйлдэж олсон эд хөрөнгөө Монгол Улсад оруулан ирж, зочид буудал барьж үндэстэн дамнасан зохион байгуулалтай мөнгө угаах гэмт хэрэг үйлдсэн Солонгосын иргэний эд хөрөнгийг шүүхийн шийдвэрийн дагуу битүүмжлэх, хураах ажиллагааг Монгол Улс, Солонгос Улсын хооронд 1999 онд байгуулсан “Эрүүгийн хэргийн талаар эрх зүйн туслалцаа харилцан үзүүлэх” тухай гэрээний дагуу Монгол Улсын тал амжилттай хэрэгжүүлсэн бөгөөд хоёр Улсын хооронд эрүүгийн хэргийн талаар эрх зүйн туслалцаа үзүүлэх ажиллагаа эрх тэгш, харилцан ашигтай байдлаар амжилттай үргэлжилж байна.

Энэ жилийн хуралдааныг Австрали Улсын Ерөнхий Прокурорын Газар, БНСУ-н Улсын Дээд Прокурорын Газар санхүүжүүлэн зохион байгуулж,  Солонгос Улсын Дээд Прокурорын Газар даргалан явуулав. Хуралдаанд 11 улс орны 20 гаруй шүүх, прокурор, цагдаагийн ажилтнууд болон Ази Номхон Далайн бүсийн орнуудын Хар тамхитай тэмцэх ажиллагааг зохицуулах олон улсын байгуулагын ажилтанууд оролцжээ.

Австрали, БНСУ-уудын  Прокурорын  байгууллагын ажилтанууд Үндэстэн дамнасан зохион байгуулалттай гэмт хэргийг мөрдөн шалгах үүрэг бүхий өөрсдийн тусгай газар хэлтсийн бүтэц, зохион байгуулалтын тухай танилцуулан, ажлын арга туршлагаасаа хуваалцсан чухал ач холбогдолтой болжээ.

Эдгээр улс орны прокурор, мөрдөн байцаах байгуулагууд нь, үндэстэн дамнасан зохион байгуулалттай гэмт хэргийг мөрдөн шалгах, гэмт хэрэг үйлдэж олсон эд хөрөнгийг олж илрүүлэх, хураах ажиллагааг бусад улс орны прокурорын байгуулагаар дамжуулан гүйцэтгүүлсэн эрх зүйн туслалцаа үзүүлэх хүсэлтийн тусламжтайгаар амжилттай хэрэгжүүлж иржээ.

БНСУ-н прокурорын байгууллага 2014 онд мөнгө угаасан нийт 552-хэрэг илрүүлэн шалгаж, 845,648 ам долларын эд зүйлийг илрүүлэн, хураасан байна.

Гэмт хэрэг үйлдэж олсон хөрөнгийг илрүүлэх, хураах талаарх Хуралдаанд тавьсан зарим илтгэлүүд англи хэл дээр Улсын Ерөнхий Прокурорын Газрын Гадаад Харилцаа Эрх Зүйн туслалцааны хэлтэст байгаа бөгөөд сонирхсон прокурорын ажилтанууд  260855, (1038)- дугаарын утсаар ярьж, ирж танилцах боломжтой байна.