Монгол Улсад Автотээврийн салбар үүсч хөгжсөний 90 жилийн ойн хүрээнд Автотээврийн үндэсний төв, Нийслэлийн тээврийн газар, Замын цагдаагийн газар хамтран хууль, дүрмийн болон автомашины уран жолоодлогын улсын аварга шалгаруулах тэмцээнийг энэ амралтын өдрүүдэд зохион байгуулж байна.  
 

Уран жолоодлогын "Автотээвэр-90" улсын аварга шалгаруулах тэмцээнд Зорчигч тээврийн нэгтгэл ОНӨААТҮГ, Монголын автотээвэрчдийн нэгдсэн холбоо, Тэнүүн Огоо ХХК болон бусад гэрээт аж ахуйн нэгж байгууллагууд оролцож өөрсдийн авхаалж самбаа, хурд хүчээ сорих аж.  
 

Тус тэмцээнд том оврын автобус, таксинд явдаг тээврийн хэрэгслүүд туг сүлжих, дугуй солих, цагираг шилжүүлэх зэрэг даалгавруудыг хийж гүйцэтгэх аж.
 

Тэмцээн хоёр төрлөөр явагдах бөгөөд Хууль дүрмийн тэмцээн нь Автотээврийн үндэсний төвийн Мэргэшсэн жолоочийн шалгалтын танхимд зохион байгуулагдах бол Автомашины уран жолоодлогын тэмцээн Зорчигч тээврийн нэгтгэл ОНӨААТҮГазрын II дугаар авто баазын мэргэшсэн жолооч бэлтгэх сургалтын жолоодлогын дадлагын талбайд  тус тус явагдахаар болжээ. 
 

"Автотээвэр-90" улсын аварга шалгаруулах энэ удаагийн тэмцээн нь “Замын хөдөлгөөнд соёлтой оролцогч” байхыг олон нийтэд уриалж, иргэдэд эрх зүйн боловсрол олгох, ухамсар соёлыг төлөвшүүлэх зорилготой гэдгийг холбогдох албаны хүмүүс мэдээлэв.