Тулгар төрийн 2224, Их Монгол Улс байгуулагдсаны 809, Ардын хувьсгалын 94 жилийн ойн их баяр наадам хүчит бөхийн барилдаанаар өндөрлөлөө. Олон шинэ цолтон төрж, аймгийн арслан П.Бүрэнтөгс ес давж улсын арслан цолтой болсон сайхан барилдаан наадамчин олныг баясгалаа. Үзүүр, түрүүний бөхчүүдэд ерөнхийлөгч Ц.Элбэгдорж цол, тэмдгийг нь гардуулснаар наадмын ажиллагаа дуусав. 

 
Монгол түмний баяр наадам сайхан болж өндөрлөж байна. Хүлэг морьдын шандас хурдан, цэц мэргэн, бөхчүүд нь хүч тэнцүү байлаа. 

 Өнөө жилийн улсын баяр наадамд шандаст хурдан хүлгүүд нь шижир алтан зурхайд тоосоо өргөж, эрхий мэргэн харваачид нь онч сумаа тавьж, наадмын зүлэг ногоон дэвжээнээ шинэ арслан, шинэ харцага, долоон начин мэндэлж, зон олон маань хотол олноороо өргөн дэлгэр, сайхан наадлаа.

Дэлхийд ганцхан монгол наадмын хүчит бөхийн барилдаанд Хэнтий аймгийн Өмнөдэлгэр сумын харьяат, улсын харцага Э.Оюунболд,  Увс аймгийн Давст сумын харьяат, аймгийн арслан П.Бүрэнтөгс үзүүрллээ.

Ийнхүү тугчид төрийн есөн хөлт цагаан тугийг Төв цэнгэлдэх хүрээлэнгээс залан Төрийн ордон руу хөдөллөө. Дараа жилийн наадам хол байна даа, хол байна.

Д.Ундрах /24tsag.mn/