Энэ жилийн наадамд түрүүлж улсын арслан цол хүртсэн Э.Оюунболдыг МУГТ, Хөдөлмөрийн баатар Ж.Мөнхбатын амжилтыг эвдсэн гэсэн мэдээлэл байгаа.

Тодруулбал, Ж.Мөнхбат 22 настайдаа түрүүлж  улсын наадамд түрүүлсэн хамгийн залуу бөх гэж дуудагдаж байсан юм. Тэгвэл энэ жил түүний амжилтыг Э.Оюунболд эвдэж наадамд түрүүлсэн хамгийн залуу бөх боллоо гэж байсан.

Мехикогийн /1968 он/олимпийн мөнгө, ДАШТ-ий хүрэл медальт, Дархан аварга Ж.Мөнхбат 1963 онд Ардын хувьсгалын 42 жилийн ойн баяр наадамд Улсын заан цолтойдоо есийн даваанд улсын заан У.Мижиддоржийг давж 22 нас 42 хоногтой дээрээ Улсын наадамдаа анх удаа түрүүлж Улсын арслан цол хүртжээ.

Ардын хувьсгалын 94 жилийн ойн баяр наадмын хүчит бөхийн барилдаанд есийн даваанд улсын арслан П.Бүрэнтөгсийг давж Монгол Улсын арслан цол хүртсэн улсын харцага Э.Оюунболд нь улсын наадамд 22 нас 120 хоногтой дээрээ түрүүлсэн байна. Үүнээс харахад, Дархан аварга Ж.Мөнхбат хамгийн залуудаа Улсын наадамд түрүүлсэн дээд амжилтаа хадгалсаар байна. Харин Э.Оюунболд Ж.Мөнхбат аваргын амжилтыг эвдэх бус давтжээ.

Улсын аварга цолтой бөхчүүд дотроос дархан аварга Б.Түвдэндорж, даян аварга С.Цэрэн нар 23 настайдаа улсын наадамд түрүүлж байсан бол улсын арслангуудаас  улсын арслан П.Бүрэнтөгс 25, улсын арслан Х.Мөнхбаатар, Н.Батсуурь нар 26 настайдаа Улсын наадамд түрүүлж байжээ.