Сүүлийн үед иргэд гол усны дэргэд амарч зугаалж явахдаа усанд эндэх тохиолдол олноор гарсаар байна. 

Хэдийгээр мэргэжлийн байгууллагаас энэ талаар анхааруулж, завьт эргүүлийг ажиллуулж байгаа ч иргэд санамсар болгоомжгүйгээс болж усанд эндэх явдал гарсаар байгаа нь үнэхээр харамсалтай. 

Өнгөрсөн баяр наадмын өдрүүдэд дөрвөн иргэн усанд осолдож, алтан амиа алдсан бол энэ тоо дахин таваар нэмэгдсэн байна. Тодруулбал  баяр наадам, амралтын өдрүүдэд Баянхонгор аймгийн Баян-Овоо суманд хоёр, Сэлэнгэ аймгийн Сайхан суманд нэг, Шаамар суманд нэг, нийслэлийн Баянзүрх дүүрэгт нэг, Налайх дүүрэг хоёр, Хан-Уул дүүрэгт хоёр, нийт есөн хүн санамсар, болгоомжгүй байдлаасаа усанд живж амь насаа алдсэн харамсалтай хэрэг гарчээ.

Түүнчлэн Сүхбаатар аймгийн Уулбаян сумын нутагт энэ сарын 13-ны өдөр аянга буусны улмаас нэг иргэн нас барж, нэг хүүхэд түлэгдсэн болохыг албаны эх сурвалж мэдээлэв.

Жил бүр усанд амиа алдах иргэдпийн тоо нэмэгдсээр байгааг мэргэжлийн байгууллагаас анхааруулж байна. Энэ он эхний долоон сарын байдлаар 12 аймгийн 28 сум, нийслэлийн гурван  дүүрэгт нийт 48 хүн амиа алджээ. Тэдний 12 нь хүүхэд байсан бол насанд хүрсэн 36 иргэн бүртгэгджээ. 

Энэ мэтээр золгүй байдлаар амь насаа алдаж байгаа ихэнх тохиолдлуудын гол шалтгаан нь амралт зугаалгаар явж байгаа иргэд согтууруулах ундаа хэрэглэсэн үедээ голын усанд орсноос болсон гэдгийг албаныхан хэлж байна.

Түүнчлэн иргэд амарч зугаалж явахдаа сонор сэрэмж алдаж, хүүхэд багачуудыг хараа хяналтгүй байлгаснаар үүдсэн гэдгийг ч албаныхан анхааруулж байгаа юм.

Тиймээс голын сав болон голын эрэг дагуу сууршиж зусч байгаа, аялал зугаалгаар явж буй иргэдийг үер усны аюулаас болгоомжилж, бага насны хүүхдүүдээ хараа хяналтгүйгээр гол руу явуулахгүй байх, голын эрэг орчмын газарт тоглуулахгүй байх, баталгаат зам гүүрээр зорчиж, гарамгүй газраар автомашинтай гол гатлахгүй байх, голд сэлж, цаашлаад амь насаа алдахаас сэргийлж анхаарал болгоомжтой байхыг сэрэмжүүлж байна. 

Энэ талаар ОБЕГ-аас мэдээлэв. Тодруулбал, 

Дорноговь аймгийн Сайхандулаан сумын Улаан шороот багийн “Хар цохио” гэдэг газар иргэн Б /71 настай , эрэгтэй/ сураггүй болсон тухай мэдээллийг өчигдрийн 21:05 цагт /21:30 цагт/ тус тус хүлээн авч Орон нутгийн 12 иргэн, 1 автомашин, 2 мотоциклтой эрэн хайх ажиллагаа зохион байгуулж байгаа ажээ.
 

Мөн Хөвсгөл аймгийн Мөрөн сумын Элст багийн нутаг Дэлгэр мөрний усанд М /8 настай, эрэгтэй/ живсэн тухай дуудлагыг энэ сарын 16-ны өдрийн 13:38 цагт хүлээн авч тус аймгийн Онцгой байдлын газрын 4 албан хаагч, 1 автомашин, орон нутгаас 15 иргэн, 2 автомашин нийт 19 хүн 3 техник хэрэгсэлтэйгээр эрэн хайх ажиллагааг зохион байгуулж байна.
 

Үүнээс гадна Өмнөговь аймгийн Даланзадгад сумын Оюут багийн 7 дугаар гудамжийн 20 тоотод иргэн Б /32 настай, эрэгтэй/ нь энэ сарын 10-ны өдөр гэрээсээ гараад сураггүй болсон тухай дуудлагыг энэ сарын 14-ний өдрийн 10:00 цагт хүлээн авчээ.

Тус аймгийн Онцгой байдлын газрын 46 албан хаагч, 9 автомашин, Цагдаагийн газрын 9 албан хаагч, 2 автомашин, ар гэрээс нь 16 иргэн, 3 автомашин, нийт 71 хүн, 14  техник хэрэгсэлтэйгээр эрэн хайх ажиллагааг зохион байгуулсан боловч үр дүнд хүрээгүй тул ар гэрийнхэнтэй нь зөвшилцөж эрэн хайх ажиллагааг зогсоосон байна.