БЗД-ийн 5-р хорооны айлууд гудамжиндаа гэрэлтэй болсондоо маш их баяртай байна. Ядаж л шөнө, орой айж мэгдэлгүй алхдаг боллоо. Гэтэл сүүлийн үед тус хорооныхны сэтгэлийг шаналгах нэг асуудал гарч ирэв. Тэр нь өнөөх  гэрлүүд нь өдөржин асаалттай өнжих  байдал. Иргэдийн хэлж буйгаар доорх гэрлүүдийг унтраалгүй нэг сар болж байгаа гэнэ.  Өдөр, шөнөгүй асаах гэрлүүдийн цаана асар их эрчим хүч, зарлага явж байгаа гэж бодохоор хайран санагдах.

Өчигдөр өдөр 12.00 цагийн байдлаар. Өнөөдөр ч бас асаалттай байна лээ.

Өдөржин асаалттай байх гэрлийг хараад хэн хүнгүй харамсах сэтгэл төрнө. Ядаж л эрчим хүч үргүй урсаж байгаа. Сүүлийн үед Эрчим хүчний яамнаас "Цахилгаанаа хэмнэе. Манай байгууллага жил бүр алдагдалтай ажиллаж байгаа. Тийм учраас айлуудын цахилгааныг нэмэхээс өөр аргагүй байдалд орлоо" гэх мэтээр мэдэгдэл хийх болсон. Гэтэл бүхэл бүтэн нэг дүүргийн гудамжины гэрэлтүүлгүүдийг унтраалгүй нэг сар болж байна шүү дээ. Иймэрхүү зүйлээсээ эхэлж хэмнэлт хийхгүй байж цахилгааны мөнгө нэмнэ гэж ярьдаг нь иргэдийн дургүйцлийг хүргэж байна. Хэмнэлт бол гэрлээ өдөрт нь унтрааж сурахаас эхэлнэ.

Цахилгааны хэмнэлт хийж буй нэрээр айл, өрх байгууллагуудын тогийг хэдэн арван цагаар тасалж орхихын оронд өдөржин асаалттай өнжих гэрлээ унтрааж сурмаар байна. Зуны цагт өглөөний 05.00 цаг гэхэд унтраагаад орой 10.00 цагт асаахад л хангалттай. Өвөл бол цагийг нь илүү ойртуулж болно. Үүнийгээ автомат тохируулгаараа хийчихвэл асуудалгүй.

Замын дагуух гэрэл айл өрхийн гэрлээс хэд дахин хүчтэй. Энэ хэрээр цахилгаан "уудаг". Нөгөөтэйгүүр, удаан асаалттай байснаар гэрэл хурдан шатдаг. Ингээд дахиад л солих хэрэг гарах болно. Гэтэл шатсан гэрлийг солиход багагүй мөнгө зарлагддаг байна. Гэрлийн нэг чийдэн 30-50 мянган төгрөгийн хооронд хэлбэлздэг аж. Үүнийг хэдэн мянгаар тоологдох чийдэнд үржүүлбэл чамлахааргүй тоо гарах нь ойлгомжтой.

Гэрлээ унтрааж, асаах тохируулгаа хийж байж дараа нь хэмнэлтээ яривал зүгээрсэн. 

Т.Сар