Өнгөрсөн амралтын өдөр зарим газар ширүүн бороо орсны улмаас нийслэлд үер буужээ.

Тодруулбал хагас сайн өдрийн 15-17 цагийн хооронд Улаанбаатар хотод усархаг бороо орсны улмаас нийслэлийн Онцгой байдлын газарт үерийн усны 13 дуудлага ирсэн байна.

Тухайлбал, Сонгинохайрхан дүүргийн 7 , 22 дугаар хороо / хуучин 22-ын товчоо, Орбит орчим/ гудамж талбай, айлын гэр, байшин, амины аж ахуйн байр усанд автсан нийт найман дуудлага ирсний дагуу  нийслэлийн Аврах ангиас нэг автомшин, есөн албан хаагч, дүүргийн ОБХ-ээс гурван автомашин 20 албан хаагч, Аврах тусгай ангиас хоёр автомашин, 17 албан хаагч нийт есөн автомашин, 51 албан хаагч 32 иргэнийг үерийн уснаас аюулгүй газарт байрлуулан, амь насыг нь авран хамгаалжээ.

Улмаар  шаварт суусан байсан таван автомашиныг татаж гарган нийт 340 гаруй сая төгрөгийн өмч хөрөнгийг үерийн аюулаас авран хамгаалсан байна.

Усанд суусан автомашин, усанд автсан айлын гэр, хашаанд усанд боогдсон иргэдээс бага насны хүүхэд тав, жирэмсэн эмэгтэй нэг байсан бол амь насаа алдсан болон бэртэж гэмтсэн хүн байгаагүй  байна. Мөн  Хан-Уул дүүргийн 12, 13 дугаар хорооны  айлуудын гэр, хашаа, гахайн байр усанд автсан 4 дуудлагын дагуу дүүргийн Онцгой байдлын хэлтсийн нийт 10 албан хаач, хоёр автомашинтай очиж усанд автсан гэрийг нүүлгэн шилжүүлж, хашаа, гахайн байранд тогтсон усыг мотопомпоор соруулан иргэдийн аюулгүй байдлыг хангаж ажиллажээ.

Налайх дүүргийн Онцгой байдлын хэлтэст өчигдөр өдрийн  14:05 цагт Төв аймгийн Эрдэнэ сумын нэгдүгээр багийн “Мандал” амралтын газрын ойролцоох Туул голын усны түвшин нэмэгдэж амралтын гэр усанд автсан гэсэн дуудлага өгсний дагуу НДОБХ-ээс бэлтгэл ээлжийн таван албан хаагч очиход “Мандал” амралтын газрын гэр болон иргэн С-ийн гурван гэр үерийн усанд автсан байсныг  аюулгүй газарт нүүлгэн шилжүүлж ажиллажээ.