Амгалан дулааны станцын нээлт өнөөдөр болжээ. Нээлт ч гэж дээ  ажлын явцтай албаныхан танилцах үйл явц өрнөсөн гэнэ.

Ерөнхий сайд Ч.Сайханбилэг, Эрчим Хүчний сайд Д.Зоригт, Нийслэлийн Засаг дарга бөгөөд Улаанбаатар хотын захирагч Э.Бат-Үүл тэргүүтэй албаныхан өнөөдөр Амгалан дулааны станцын бүтээн байгуулалтын ажилтай танилцжээ.

Тус станц ирэх аравдугаар сарын 15 гэхэд ашиглалтад орох юм байна.  Тус станцын барилгын гүйцэтгэгчээр БНХАУ-ын "СМЕС" компани ажиллаж байгаа бөгөөд 2013 онд эхлүүлсэн станцын барилга угсралтын ажил одоогоор 95 хувьтай явагдаж байна.

Станцын үлдсэн хэсгийг дуусгахад 3.9 тэрбум төгрөг шаардлагатай болжээ. Тухайлбал, 110-н агаарын өргөтгөл шинэчлэлийн ажил, гадна талбайн төмөр замын завсар шинэчлэл /400 сая төгрөг/, 2-3 худаг нэмж ухах ажил гээд хөрөнгө шаардлагатай байгаа аж.

Мөн станц барихад ашиглаж байгаа БНХАУ-аас оруулж ирсэн тоног төхөөрөмжүүдийн хугацааг сунгаж өгөхийг Гаалийн Ерөнхий газраас хүсчээ. Уг станц нь нийт өртөг нь 75.9 сая ам.доллар бөгөөд Монгол Улсын Хөгжлийн банкнаас бондын хөрөнгөөр санхүүжүүлж байгаа юм.

Д.Дуулим