Орхон аймгийн Баян-Өндөр сумын Эрдэнэ багийн 9-10 тоот, “Хүлэг” хүнсний захын хашаан дотор, хүнсний ногооны зооринд хоёр хүн ухаан алдаж унасан тухай дуудлага энэ сарын 21-ний өдрийн 11:56 цагт аймгийн Онцгой байдлын газарт ирсэн байна. 
 

Дуудлагын дагуу тус аймгийн Онцгой байдлын газрын Эрэн хайх, аврах бүлгийн таван албан хаагч, нэг автомашинтайгаар ослын газар очиход 5-6 метрийн гүнтэй, хүнсний ногооны зориулалттай нүхэн зооринд иргэн 43 настай, эрэгтэй Н, 45 настай, эрэгтэй Х нар унаж, агааргүйн улмаас нас барсан байдалтай байжээ. 
 

Талийгаачдын цогцсыг зоориноос гаргаж, аймгийн Цагдаагийн газрын жижүүрийн бүрэлдэхүүнд хүлээлгэн өгсөн байна. Хэргийн газар аймгийн Онцгой байдлын газар, Цагдаагийн газар, Мэргэжлийн хяналтын  газар, “Эрдэнэт үйлдвэр” ХК-ийн Гамшгаас хамгаалах штабын тэргүүлэх мэрэгжилтэн Р.Энхболд, Хөдөлмөрийн аюулгүй байдал, эрүүл ахуйн хэлтсийн хими, цацрагийн асуудал  хариуцсан инженер Д.Батсайхан нар хамтран ажиллласан бөгөөд ажлын хэсэг уг зоориноос “TAPPA” багажаар орчны агаарт хэмжилт хийхэд ямар нэгэн цацраг, химийн шинж тэмдэг илрээгүй тухай мэдэгджээ.