Энэ сарын 01, 02-н буюу өнгөрсөн амралтын өдрүүдэд нийслэлийн хэмжээнд 15 осол гарч, ослын улмаас нэг хүн нас барж, 16 хүн гэмтжээ.

Түүнчлэн эд материалын хохиролтой зам тээврийн осол 23 гарсан байна. Хөдөө орон нутагт хоёр ослоор хоёр хүн нас барсан харамсалтай хэрэг гарчээ.

Тухайлбал, 2015 оны 08 дугаар сарын 01-ний өдөр Хан-Уул дүүргийн 5-р хороо, Яармагийн замд амины H.Grace маркын автомашины жолооч Н нь 58 настай эрэгтэйг мөргөж амь насыг нь хохироожээ.

Харин 2-ны шөнийн 01:00 цагийн орчимд Дорнод аймгийн Хэрлэн сумын 7 дугаар баг 43-р байрны урд замд одоогоор хэн болох нь тогтоогдоогүй иргэнийг улсын дугаар марк тодорхойгүй тээврийн хэрэгсэл мөргөж амь насыг хохироон ослын газрыг орхин явсан хэргийг шалгаж эхэлжээ.Мөн өдрийн 22.50 цагт Баянхонгор аймгийн Буу цагаан сумын “Хонгор дэрс” гэдэг газар марк, улсын дугаар тодорхойгүй “Г” жолоочтой мотоцикл онхолдож, жолооч Баянхонгор аймгийн Буу цагаан суманд оршин суух 39 настай эрэгтэй Г нас барсан ноцтой ослууд гарсан байна.

Дээрх өдрүүдэд замын цагдаагийн алба хаагчид согтууруулах ундааны зүйл уусан үедээ тээврийн хэрэгсэл жолоодсон 174 жолоочийг илрүүлж, гарч болзошгүй зам тээврийн осол, хэргээс урьдчилан сэргийлж ажиллажээ. Согтууруулах ундааны зүйл уусан үедээ тээврийн хэрэгсэл жолоодож зам тээврийн осол гаргасан жолооч  зургаа, согтуугаар хөдөлгөөнд оролцож гэмтсэн явган зорчигч нэг байна.   

Хүүхэд өртсөн осол тав гарсаны гурав нь сургуулийн өмнөх насны, хоёр нь сургуулийн насны хүүхэд байсан ба бүгд явган зорчигч хүүхдүүд байжээ.