Эртний судар, эд өлгийн зүйлийг хил давуулах гэж байгаад баригджээ. БНХАУ-ын ӨМӨЗО-ны иргэн Ё гэгч 21 Дарь эх болон Нархажидын гар бичмэл зэрэг 30 орчим эртний судар, мөнгөн савхтай хийжүү, хээгээр чимэглэсэн хэт хутга, цаа бугын эврээр хийсэн гар хийцийн хутгыг хууль бусаар хил давуулахыг завдсан байна.

Мөн иргэн Ё нь гар тээшиндээ мөн XIX зууны үеийн сунадаг гуулин дурангаас гадна мөнгөөр бүрсэн модон тагш, оюу, шүрэн шигтгээтэй эртний мөнгөн бугуйвч, чулуун сийлбэр бар, уран шувууны үүр, байгалийн чулуу авч явж байжээ. 
 

Замын-Үүд боомт дахь Хилийн мэргэжлийн хяналтын албаны байцаагч Б.Бат-Эрдэнэ олон улсын галт тэргэнд  шалгалт хийж байх явцдаа түүний үйлдлийг илрүүлж эртний судар, эд өлгийн зүйлс алдагдахаас сэргийлж чаджээ. Түүнийг Замын-Үүд сум дахь тагнуулын байгууллага саатуулан шалгаж байгаа аж.