Монгол улсын иргэн 30-н настай А болон 38-н настай Б нар нь өнгөрсөн Даваа гаригийн өглөө 08.30 цагийн орчим Солонгос улсын Кангванду аймгийн Жүнчон хот дахь нэгэн гүүрэн дээр засварын ажил хийж байгаад  осолдож голын усанд унаж амь насаа алдсан харамсалтай хэрэг гарсан билээ. 

Тэдгээр залуус нь Солонгос улсад зорчих гурван сарын визтэй түр ирээд байхдаа ажил хийж мөнгө олж байсан ба нэг нь ердөө долоо хоногийн дараа эх орон руугаа буцах онгоцны тасалбараа авсан байсан аж.

Осол гардаг өдөр гүүрний нэг талд хоёр Монгол, нөгөө талд хоёр Солонгос иргэд өргөгч кранаас унжуулан бэхэлсэн тавцан дээр зогсож гадна талын хананы хуучирсан будаг, цементийг хуулах ажлыг хийж байсан байна. Гэвч Монгол залуус тавцан дээр зогсон ажиллаж байхдаа тавцангийн нэг талд хоёулаа зогссоноос болж тавцан тэнцвэрээ алдан нэг тийш далийж, тэд 10 метр өндрөөс голын ус руу унаж амиа алдсан.  

Гол руу унасан залуусыг аврах ажиллагааг цаг алдалгүй эхлүүлсэн ч тэд усанд живж амь насаа алдсан харамсалтай хэрэг болсон талаар бид мэдээлсэн билээ. 

Харин "Гүүрэн дээрх ажлыг гүйцэтгэж байсан Солонгос компани нь аялал жуулчлалын C3 ангилалын визээр тус улсад ирсэн Монгол залуусыг хууль бусаар ажиллуулж байсан ба тэд аюулгүй ажиллагааны дүрмийн дагуу аврах хантааз өмсгөх ёстой журмыг баримтлаагүй байсныг илрүүлэн шалгаж байна" гэж Кангвандугийн цагдаагийн газраас мэдээлэв.