Энэ жилийн хувьд, нийт нутгаар гантай ч аймаг, сум өөр, өөр байсан учраас ургацын байдал ч харилцан адилгүй байгаа аж. Ийм учраас тариа хураалтын үеэр сум цаашлаад аж ахуйн нэгжүүдэд техник, тоног төхөөрөмжөө тохируулах, харилцан адилгүй технологийг барьж ажиллах нь зүйтэй гэж дүгнэжээ. Агрономичдын хувьд, Тариалан эрхлэгчдийг дэмжих сангаас тариаланчдад олгосон зээл тусламжийг нэг жилээр сунгаж өгөх, намрын тариа хураалтан дээр техник, технологийн бэлэн байдлыг хангаж ажиллах зэрэг асуудлуудыг хөндсөн байна.

Энэ үеэр ХХАА-н сайд Р.Бурмаа “Манай ургацын комисс орон нутгаас байнга мэдээлэл авч, үүнийхээ дагуу асуудлуудыг цаг тухайд нь шийдэж байгаа. Түүнчлэн аймгуудын газрын дарга нар тариаланчид та бүхнээс мэдээлэл авч байгаа. Урьдчилсан байдлаар 280 мянга орчим тонн улаан буудай хурааж авна. Үүн дээр дутагдаж буй хүнсний улаанбуудай, үрийн буудайн нөөцийг бүрдүүлэхэд 80 тэрбум төгрөг, ногоон тэжээл бэлтгэхэд 10 тэрбум төгрөгийг Засгаас газрын хуралдаанаар шийдүүлсэн. Энд юуны түрүүнд дотоодынхоо тариаланчдын тарьсан стандартын шаардлага хангасан хүнсний улаанбуудайг худалдаж авна. Ер нь байгалийн хүчин зүйлийн нөлөөнөөс гадна олон жилийн дундаж ямар байна вэ гэдгийгөөрсдөө судалж, санаа тавьж байх нь зүйтэй байна’’ хэмээв.