Улаанбуудай хомсдох сургаар гурил, талхны үнэ нэмэгдэв. Гурил 50-200 төгрөгөөр нэмэгдсэн бол талх үйлдвэрээсээ 100 төгрөгөөр нэмэгдэж ирсэн талаар худалдагчид ярьж байна. Тодруулбал, уржигдар манай дотоодын талхны хэрэгцээний 60 орчим хувийг дангаараа хангадаг “Талх-Чихэр” компани бүх талхныхаа үнийг 100 төгрөгөөр нэмжээ. Мөн сүүлийн хоёр долоо хоногийн дотор “Цесна”-гаас бусад гурилын үнэ кг тутамдаа 100 төгрөгөөр өсч, “Алтантариа” 1 гурил кг нь 1100, дээд кг нь 1300 төгрөг, “Өег” кг нь 960 төгрөг болжээ. Талхны хувьд, “Атар” талхны үйлдвэрийн үнэ 1000 төгрөг байснаа 1100 болж, хүнсний дэлгүүрүүдээр 1150-1200 төгрөгөөр борлуулж эхэлжээ. “Мишээл” зүссэн талхны хувьд үйлдвэрийн үнэ 100 төгрөгөөр нэмэгдэж 1300 болсон бол хүнсний мухлаг дэлгүүр 1350-1380 төгрөгөөр зарж байна. “Талх-Чихэр” компанийн албаны хүний хэлж буйгаар “Нэг кг гурилаа цавуулгаас нь хамаарч 720-850 төгрөгөөр нийлүүлдэг байснаас 850-900 төгрөг болгож өсгөсөн” гэв.

Гурил болон талхны үнэ ингэж нэмэгдсэн нь ургацынхаа 80 орчим хувийг алдах нь гэсэн мэдээлэлтэй холбоотой. Тус мэдээллийн сургаар гурилын үйлдвэрүүд үнээ нэмсэн нь ийм үр дүнд хүргэж байгааг иргэд ярьж байна. Харин салбарын яамнаас ургацын 80 биш 40 орчим хувийг л алдана гэж мэдэгдэж байгаа юм. Гэхдээ энэ сарын 25-нд ургацын блансаа эцсийн байдлаар гаргана гэж буй.

Ургацынхаа 40 хувийг алдлаа гэж тооцоход манайх ирэх онд гурилынхаа хэрэгцээний 50 орчим хувийг л дотооддоо үйлдвэрлэх боломж байгааг ХХААЯ-аас хэлж байна.

Гэхдээ ургацынхаа хэдэн хувийг ч алдахыг эцсийн байдлаар тодорхой болгоогүй байхад гурилын үйлдвэрүүд урьдчилж үнээ нэмж эхэлж буй нь цаашид ямар үр дүнд хүргэхийг таахад бэрх байна.

Т.Сар