Нийслэлийн төсвийн хөрөнгөөр барьж буй бага сургууль, цэцэрлэгийн 14 цогцолборын барилгын ажлын явцтай Нийслэлийн Засаг даргын Хот байгуулалт, Хөрөнгө оруулалт хариуцсан орлогч С.Очирбат болон албаны хүмүүс өчигдөр танилцлаа. Энэ хичээлийн жилд нийслэлийн хэмжээнд шинээр 30 орчим сургууль, цэцэрлэг ашиглалтад орох юм. Үүнээс 14 нь бага сургууль, цэцэрлэгийн цогцолбор байх аж. Багтаамжийн хувьд сургууль нь 180, цэцэрлэг нь 120 хүүхдийн хүчин чадалтай юм байна.
Хан-Уул дүүргийн XV хороо, X хорооны бага сургууль, цэцэрлэгийн цогцолборууд ирэх аравдугаар сард ашиглалтад орох гэнэ. Одоогоор Хан-Уул дүүргийн XV хорооны цогцолборын барилгын ажил 80 хувийн гүйцэтгэлтэй байна. Тус хороонд цэцэрлэгийн насны 800 гаруй хүүхэд байдаг боловч ганц ч цэцэрлэг байхгүйг албаныхан хэлж байлаа.
Энэхүү цогцолборын барилгын ажил ерөнхийдөө дуусч, гаднах тохижилт, шугам сүлжээний ажил үлджээ. Энэ үеэр шугам сүлжээний ажлын хөрөнгийг нийслэлээс дараа долоо хоногоос олгохоор болсныг дуулгасан юм. Мөн Хан-Уул дүүргийн X хороо буюу Морингийн даваанд барьж буй бага сургууль, цэцэрлэгийн цогцолборын ажил нэлээд эрчимтэй явжээ. Биднийг очиход дотор чимэглэл, гаднах талбайн тохижилтыг гүйцэтгэгч компани хийж байлаа. Шугам сүлжээний санхүүжилт орчихвол ажил хурдан дуусна хэмээн гүйцэтгэгч компанийн захирал Д.Батгэрэл хэлж байв. Үүнээс гадна тус дүүргийн XIV хороо буюу Өлзийт хороололд мөн цогцолбор барьж байгаа юм. Дээрх хоёр цогцолборыг бодвол уг барилгын гүйцэтгэл тааруухан явж байлаа. Учир нь Өлзийт хороололд цахилгааны хүчин чадал муу байдаг тул гагнуур, аппарат хоёрыг зэрэг ажиллуулах боломжгүй аж. Энэ талаар “Аглут” компанийн захирал В.Энхжаргал “Цахилгааны хүчдэл байхгүй учраас бид өөрсдөө тогны эх үүсвэр авч ирж ажлаа хийж байгаа. Үүнээс шалтгаалан ажил удаашралтай байна. Хоёрдугаарт ус байхгүй. Бид холоос усаа зөөж байгаа. Мөн энэ хэсэг бүтцийн хувьд хонхордуу газар. Үерийн усанд автах эрсдэлтэй. Биднийг ажлаа хийж байхад хоёр ч удаа үер буусан. Энэ нь зориулалтын бус үерийн далангийн цаана ус их хэмжээгээр хуримтлагдаж, амархан сэтэлж, үер болж байна. Тиймээс үерийн даланг нийслэлийн удирдлагууд шийдэж өгч байх шиг байна гэлээ.
Түүнчлэн Сонгинохайрхан дүүргиийн XXIV хороо буюу Баруун салаа, Баянгол дүүргийн VII хороонд бага сургууль, цэцэрлэгийн цогцолбор барьж байна. Эдгээр 14 цогцолборыг барьж ашиглалтад оруулснаар 3000 гаруй хүүхэд сургууль, цэцэрлэгт хамрагдах боломжтой аж. Мөн гурван ээлжээр хичээллэдэг сургуулийн тоо ч тодорхой хэмжээгээр буурахыг нийслэлийн Боловсролын газрын орлогч дарга Р.Түвшинбат хэлэв. Энэ хичээлийн жилд 24 сургууль гурван ээлжээр хичээллэх юм байна.
