Монгол улсын Засгийн газрын 2012-2016 оны үйл ажиллагааны хөтөлбөрт тусгагдсан “Зөв Монгол хүүхэд” хөтөлбөрийг хэрэгжүүлэх зорилгоор Нийслэлийн Баянзүрх дүүргийн Засаг даргын Тамгын газар, Нийгмийн хөгжлийн хэлтэс, Хүүхэд, гэр бүлийн хөгжлийн төв хамтран “Эх орон 36” арга хэмжээг зохион байгуулж, зорилтот бүлгийн 150 хүүхдийг зусланд амраалаа.

Хүүхэд, өсвөр үеийнхэнд эх оронч үзэл төлөвшүүлэх, эр зоригийн чадваруудыг эзэмшүүлэх, бие даасан байдал, оролцоог нь дэмжих, бүтээлч сэтгэлгээтэй, оюунлаг, өрсөлдөх болон эрсдлээс өөрийгөө хамгаалах чадвартай иргэн болж төлөвшихөд нь дэмжлэг үзүүлэх зорилготой тус арга хэмжээний нээлтэд Засаг даргын орлогч Т.Баясах, Нийгмийн хөгжлийн хэлтсийн дарга С.Сувд-Эрдэнэ нар оролцсон.

“Эх орон 36” арга хэмжээг дэмжин дүүргийн Улаан Загалмайн хороо, Скаутын холбоо, Шавь цогцолбор сургууль, Ус сувгийн удирдах газар, Дэлхийн зөн Монгол олон улсын байгууллага Дарь-Эх орон нутгийн хөгжлийн хөтөлбөр, Сансар зуслан, Зэвсэгт Хүчний 150 дугаар анги хамтран оролцсон юм.