Дулааны улиралд иргэд мотоцикл, мопед, дугуйг унаж хөдөлгөөнд оролцож байхдаа өөрсдийнхөө аюулгүй байдлыг хангаагүйн улмаас бэртэж гэмтэх, амь насаа алдах явдал гарсаар байгааг Замын цагдаагийн газраас иргэдэд анхаарууллаа.

Тухайлбал, энэ сарын 12-ны өдрийн 19.08 цагийн үед Баянзүрх дүүргийн 13 хороо,  Энхтайваны өргөн чөлөө, Замын цагдаагийн тасгийн байрны хойд замд амины Toyota Sprinter маркын автомашины жолооч Л нь амины улсын дугааргүй /0000/ “П” жолоочтой Мопедтой мөргөлдөж, мопедны жолооч /23н.эр/ гэмтсэн байна.

Түүнчлэн, энэ сарын 13-ны өдрийн 13.50 цагийн үед Баянгол дүүргийн 12 хороо, Хасбаатарын гудамж, Энхбаярын замын уулзварт амины “Hyundai Sonata-5” маркын автомашины жолооч Г нь улсын дугааргүй С жолоочтой мопедтой мөргөлдөж мопедны жолооч 22 настай эрэгтэй С нас барсан харамсалтай хэрэг гарчээ.

Мөн энэ сарын 12-ны 20.10 цагийн үед Ховд аймгийн Мянгат сум Чацарганат багийн нутаг Цахирын худаг гэх гэх газарт улсын дугааргүй БНХАУ-д үйлдвэрлэгдсэн Мустанг-5 маркын мотоцикль онхолдож, 40 настай эрэгтэй жолооч Ч нас барсан хэргүүдийг шалгаж байгаа аж.

Иймд мотоцикл, мопед, дугуйг унахдаа хамгаалах малгай өмсөх, гадна талын гэрэлтүүлэх хэрэгслийг зөв хэрэглэх, техник хэрэгслийн бүрэн бүтэн, аюулгүй байдлыг хангах, Монгол Улсын замын хөдөлгөөний дүрмийг биелүүлэх, хэрэгжүүлэх, хурд хэтрүүлэхгүй байх, улсын дугаар, бичиг баримтын ямар нэгэн зөрчил дутагдалгүй  хөдөлгөөнд  нь оролцох нь чухал гэдгийг сануулж байна.

Ялангуяа мотоцикл мопедоор үйлчилгээ явуулж байгаа пицца, хоол хүргэлтийн аж ахуйн нэгж байгууллагууд ажилтан алба хаагчдынхаа аюулгүй байдлыг хангасан нөхцөлд үйлчилгээ үзүүлэхийг Замын цагдаагийн газраас анхаарууллаа.