Тэртээх 1945 оны Чөлөөлөх дайны ялалт Монгол Улсыг дэлхийн тавцанд олон улсын харилцааны нэгэн субьект болохыг харуулсан түүхэн ач холбогдолтой үйл явдал болсон билээ. Энэхүү ялалтын түүхт 70 жилийн ой энэ жил тохиож буй. Ойг угтан түүхэн ялалтын үнэ цэнэ, дайнд оролцогсод ахмад дайчиддаа хүндэтгэл үзүүлэх, цэрэг эрсийн байгуулсан гавьяаг сурталчилах, зэвсэгт хүчний хамтын ажиллагааг хөгжүүлэхэд түлхэц өгөхүйц цогц арга хэмжээг Монгол Улсын Засгийн газрын 85 дугаар тогтоолын дагуу Батлан хамгаалах яамнаас хэрэгжүүлж буй. Зохион байгуулж буй арга хэмжээнүүдийнхээ талаар БХЯ-наас өнгөрсөн баасан гарагт мэдээлэл хийлээ. Энэ үеэр БХЭШХ- ийн Цэргийн түүх судлалын төвийн дарга, хурандаа С.Ганболд “Монгол Улсын Ерөнхийлөгчийн зарлиг, Засгийн газрын тогтоолын дагуу Чөлөөлөх дайны ялалтын ойн баярыг хоёр үе шаттай хэрэгжүүлж байгаа. Ажлын нэгдүгээр хэсгийн онцлог нь ОХУ-ын Ерөнхийлөгч В.Путин зарлигаа гаргаж манай ахмад дайчдад ойн медаль өгсөн.

Монголын цэргүүд Москва хотын Улаан талбайд цэргийн ёслолын жагсаалд алхсан” гэлээ. Харин ойн ажлын хоёрдугаар шатанд Олон улсын эрдэм шинжилгээний хурал болон урлаг соёлын арга хэмжээ зохион байгуулах, БНХАУ- ын нутагт байгаа Монгол дайчдын дурсгалын хөшөөнд хүндэтгэл үзүүлэх, Сүхбаатар, Дорноговь аймгуудад ёслол хүндэтгэлийн ажил зохиох, ялалтын 70 жилийн баримтат кино, түүхэн ном, альбом бүтаэх, Монгол, Зөвлөлтийн дайчдын хөшөө, дурсгалыг сэргээн засварлах ажлууд багтаж байгаа аж.

Д.Дуулим