Зүүн хойд Азийн аялал жуулчлалын 11 дүгээр форум (IFNAT) 2015 оны наймдугаар сарын 19-21-ний өдрүүдэд Монголын үндэсний худалдаа аж үйлдвэрийн танхимд болох гэж байгаатай холбогдуулан БОНХАЖЯ-ны Төрийн захиргаа, удирдлагын газрын дарга Ө.Сумьяабаатар, Нийслэлийн Аялал жуулчлалын газрын дарга Э.Баттулга, Монголын үндэсний худалдаа аж үйлдвэрийн танхимын Аялал жуулчлалын газрын дарга Ш.Нэргүй, Монголын аялал жуулчлалын холбооны гүйцэтгэх захирал Д.Батнасан нар олон нийтэд зориулж мэдээлэл өглөө.
Форумын зохион байгуулагчаар БОНХАЖЯ, Нийслэлийн Засаг даргын хэрэгжүүлэгч агентлаг - Нийслэлийн аялал жуулчлалын газар, Монголын үндэсний худалдаа аж үйлдвэрийн танхим, Монголын аялал жуулчлалын холбоо хамтран ажиллаж байна. Энэ жилийн форумд БНХАУ-аас 20, Японоос 40, БНСУ-аас 50, ОХУ-аас 10, Монголоос 120 орчим төлөөлөгч оролцохоор бүртгүүлээд байна. Форумыг 2008 онд Монголд анх удаа зохион байгуулж байсан ба тухайн үед эко туризмын асуудлыг хөндөж байжээ.
Харин энэ жил MICE tourism буюу “Олон улсын хурал, бизнес аялал, тэмдэглэлт үйл явдал, үзэсгэлэнгийн зах зээл” гэсэн сэдвийн дор зохион байгуулах гэж байна. Энэ үеэр мөн “Зүүн хойд Азийн эко туризмыг хөгжүүлэх нь” сэдвийн дор олон улсын оюутан залуусын илтгэлийн уралдаан, хэлэлцүүлэг болно. Форумд 40 гаруй илтгэл тавигдах бөгөөд Зүүн хойд Азид аялал жуулчлалыг хэрхэн хөгжүүлэх, Улаанбаатар хотод бизнес аялал жуулчлалыг хэрхэн яаж хөгжүүлэх вэ зэрэг сэдвээр илтгэл тавигдах ажээ.
Зүүн хойд Азийн бүс нутгийн хөгжил дэх аялал жуулчлалын салбарын оролцоог тодорхойлох, тулгарч байгаа хүндрэлтэй асуудлуудыг хамтдаа шийдэх гарц гаргалгааг олох, бүс нутаг дахь аялал жуулчлалын салбарын хамтын ажиллагааг сайжруулах, хил дамнасан жуулчин солилцоог нэмэгдүүлэх, аялал жуулчлалын илүү үр өгөөжтэй шинэ боломжуудыг нээх, туршлага, мэдээллээ солилцох жишиг болж байгаагаараа энэхүү форум нь чухал ач холбогдолтой юм. Зүүн хойд Азийн аялал жуулчлалын олон улсын форум (IFNAT)-д улс орнуудын аялал жуулчлалын асуудал эрхэлсэн төрийн байгууллагууд, судлаачид, аяллын агентлагууд, оюутан залуус зэрэг салбарын олон давхаргын төлөөлөл оролцдог юм гэж БОНХАЖЯ-ны Хэвлэл мэдээллийн албанаас мэдээллээ.
