“Эрдэнэс Тавантолгой” компанийн ТУЗ-ийн дарга, ЗГХЭГ-ын дэд даргаар ажиллаж байсан Г.Дэнзэнг албан тушаалаа урвуулан ашигласан хэрэгт сэжиглэн АТГ-аас цагдан хориод байгаа билээ. 

Түүнд холбогдох хэргийн шүүх хурал болоогүй бөгөөд Г.Дэнзэн сэжигтэн төдий байгаа ч түүнийг мөрдөн байцаалтын ажиллагаанд саад учруулна гэсэн үндэслэлээр саатуулаад байгаа.

Харин Г.Дэнзэн хууль шүүхийн энэ мэт бусармаг үйлдлийг эсэргүүцэн хоёр долоо хоногийн өмнөөс өлсгөлөн зарлаж эхэлсэн. Уг нь түүнийг өлсгөлөн зарлаж болохгүй, сахарын өвчинтэй учраас хүндэрнэ гэсэн дүгнэлтийг эмч нар гаргасан. Гэвч тэрбээр үүнийг үл тоон өлсгөлөн зарласан хэвээр байгаа юм. Энэ хугацаанд Г.Дэнзэн хоёр ч удаа ухаан алдаж, бүр комын байдалд орсон гэх мэдээлэл гараад байгаа билээ. 
 

Тэгвэл Г.Дэнзэн гэрээслэлээ бичжээ. Үүнийгээ түүнтэй уулзахаар очсон УИХ-ын гишүүн Ц.Оюунгэрэлд өгсөн байна. Энэ талаар УИХ-ын гишүүн Ц.Оюунгэрэлээс тодруулахад "Г.Дэнзэн гэрээслэл бичсэн гэдэг нь үнэн. Би түүний гэрээслэлийг өмгөөлөгчид нь өгсөн. Түүний бие маш хүнд байна лээ" хэмээв.  Харин хэнд, юуны талаар гэрээслэл бичсэнийг тодруулахад "Түүний өмгөөлөгч энэ талаар мэдээлэл өгөх байх" гэсэн хариултыг өгсөн юм.