Хөвсгөл аймгийн Цагаан-Уул сумын Агар багийн “Агарын голын гурван чулуу” гэдэг газар /сумын төвөөс баруун хойд зүгт 50 км-т/ 16 настай, эрэгтэй Д энэ сарын 10-ны өдөр нохойд хазуулсан тарвага өвчиж байгаад гараа зүссэн байна.
Улмаар гар нь хавдаж, халуурсан байдалтайгаар энэ сарын 14-ний өдрийн 10:00 цагт сумын эмнэлэгт хэвтэн эмчлүүлж байгаа аж.
Харин 16-ны өдрийн 14.00 цагт гарсан өвчтөний шинжилгээний хариугаар “Тарваган тахал” үүсгэгч булчирхай хэлбэрээр өвчилсөн нь тогтоогдсон бөгөөд шинжилгээг баталгаажуулахаар давтан шинжилгээ хийжээ. Одоогоор өвчтөний биеийн байдал сайжирч байгаа хэмээн албаны эх сурвалж мэдээлэв.
Мөн тус сумын Засаг даргын наймдугаар сарын 14-ний өдрийн А/89, аймгийн Засаг даргын мөн өдрийн А/296 дугаар захирамжаар тус тус 14 хоногийн хугацаатай хорио цээрийн дэглэм тогтоосон байна.
Голомтод аймгийн Зооноз өвчин судлалын төвөөс найман хүний бүрэлдэхүүнтэй ажлын хэсэг томилогдон нэгдүгээр хавьталттай болон хоёрдугаар хавьталттай тус бүр найм, нийт 16 иргэнийг тусгаарлан, шинжилгээ хийж байгаа аж.
Сумын хэмжээнд найман хүний бүрэлдэхүүнтэй хээрийн штаб, хяналтын 10 цэгт аймгийн Онцгой байдлын газрын найман албан хаагч, нэг автомашин, Цагдаагийн газраас гурван албан хаагч, нэг автомашин, орон нутгийн 19 иргэн, есөн автомашин, нийт 30 хүн, 11 техник хэрэгсэлтэйгээр ажиллаж байгаа гэнэ.
Мөн энэ сарын 16-ны өдрийн 11:00 цагаас Мөрөн суманд “Хилэнтийн гүүр”, “Мөрөн” нисэх буудлын урд талын зам, тус аймгийн Бүрэнтогтох сумын “Улаан богоч” гэдэг газарт хяналтын пост гарган, аймгийн Цагдаа, Байгаль орчин, Мэргэжлийн хяналтын газраас найман албан хаагч, гурван техник хэрэгсэлтэйгээр ажиллаж байгаа юм байна.
