МОХ-ноос нийтийн тээврийн хөнгөлөлтийн эрх, сургалтын төлбөрийн талаар Их, дээд сургууль, коллежийн удирдлага удирдах зөвлөлд мэдэгдэл хүргүүлнэ гэв.

Уг мэдэгдэлд “Энэ хичээлийн жилд төрийн албан хаагчийн цалин нэмэгдээгүй, цахилгаан дулааны үнэ их, дээд сургуулийн сургалтын төлбөрт нөлөөлөхүйц хэмжээнд өөрчлөлт ороогүй. Элсэлтийн хэмжээ багасч дотуур байр өргөтгөх шинээр барих шаардлагагүй тул сургалтын төлбөрийг нэмэх үндэслэлгүй хэмээн үзэж байна. Иймээс сургалт болон дотуур байрны төлбөрийн нэмэгдлийг зогсоохыг шаардаж байна” гээд үндсэн таван шаардлага хүргүүллээ. Хэрэв шаардлагын хариуг энэ сард багтаж өгөхгүй бол Оюутан залуучуудын сургалтын төлбөрийн эсрэг түр хорооноос олон нийтийг хамарсан эсэргүүцлийн жагсаал зохион байгуулна гэлээ.

Нийтийн тээврийн хөнгөлөлтийн эрхийн талаар МОХ-ны дэд ерөнхийлөгч Н. Санчирбаатар тайлбар хийв. Нийслэлийн удирдлагын зүгээс зөвхөн УБ хотын иргэнд нийслэлийн төсөв зарцуулагдах ёстой гэж яриад байгаа. Тэгвэл Хөдөө орон нутгаас ирж буй оюутнууд яах вэ, суралцах хугацаандаа хотын иргэн болох уу гэдэг асуудал урган гарч ирнэ. Одоогийн гарах гэж буй журмаар нэг оюутан хоёр удаа үнэгүй сэлгэн зорчих эрхтэй. Хэрэв  шаардлагатай бол сэлгэн суулт нь 30 минут байх, нэг оюутан өдөртөө 4 удаа суух гэдэг ч юм уу шийдвэрт Оюутны холбооны зүгээс санал тавьж болно. Нийслэлийн албан тушаалтнууд шийдвэрээ гаргаж чадахгүй байна.  МОХ-оос энэ жилийг “Бизнес эрхлэгчдийн жил” болгож байгаа юм. Учир нь хувиараа ажил хийдэг олон мянган оюутныг дэмжиж ажиллана. Оюутнуудын нийтийн тээврийн хөнгөлөлтийн эрхийн 70 мянга гаруй карт хэвлэгдэж бэлэн болсон гэв.