Монгол Улсад прокурорын байгууллага үүсч, хөгжсөний 85 жилийн ой, Прокурорын албаны өдөрт зориулсан баярын хурал  Соёлын  төв өргөөнд боллоо.

Улсын Ерөнхий Прокурорын орлогч, Төрийн хууль цаазын шадар зөвлөх Г.Эрдэнэбат баярын хурлын ажиллагааг нээж, Монгол Улсын Ерөнхий прокурор, Төрийн хууль цаазын тэргүүн зөвлөх М.Энх-Амгалан “Прокурорын байгууллагын түүхэн замнал” илтгэл тавилаа.

Баярын хуралд Монгол Улсын Ерөнхийлөгч Ц.Элбэгдорж, УИХ-ын дэд дарга, УИХ-ын гишүүн Л.Цог, УИХ-ын Хууль зүйн байнгын хорооны дарга Д.Ганбат, УИХ-ын гишүүн Ц.Нямдорж, Д.Лүндээжанцан, Ц.Оюунбаатар, Улсын Дээд шүүхийн Ерөнхий шүүгч Ц.Зориг, Үндсэн Хуулийн Цэцийн орлогч дарга Н.Жанцан, Засгийн Газрын гишүүн, Хууль зүйн сайд Д.Дорлигжав зэрэг албаны хүмүүс оролцлоо. Баярын хуралд УИХ-ын дэд дарга Л.Цог, Хууль зүйн сайд Д.Дорлигжав нар прокурорын байгууллагад ажиллаж байсан дурсамжаасаа хуваалцан, баяр хүргэж үг хэлэв.

УИХ-ын дарга З.Энхболд прокурорын байгууллагын 85 жилийн ойг тохиолдуулан баярын мэндчилгээ илгээснийг УИХ-ын Хууль зүйн байнгын хорооны дарга Д.Ганбат уншин танилцуулав.

Монгол Улсад прокурорын байгууллага үүсч, хөгжсөний 85 жилийн ойн баярын хуралд Монгол Улсын Ерөнхийлөгч Ц.Элбэгдорж оролцож “Шүүх эрх мэдлийг шинэчлэх, хэрэгжүүлэхэд чин сэтгэлээсээ дэмжсэн хүмүүс бол манай прокурорууд, шүүхийнхэн, хуулийн байгууллагынхан. Тиймээс та бүхэнд талархал илэрхийлж, баярлалаа гэж хэлэх гэж ирсэн юм” хэмээн нийт прокуроруудад баяр хүргэж, үг хэллээ.