Сүхбаатарын талбайн нэрийг “Чингис хаан” болгон өөрчлөх шийдвэрийг 2013 оны долдугаар сард нийслэлийн иргэдийн төлөөлөгчдийн хурал гаргасан. Тухайн үед МАН-ынхан ингэж нэрлэхийг эсэргүүцэж байсан билээ. Тэгвэл Д.Сүхбаатарын үр хүүхдүүд төв талбайн нэрийг  “Чингис хаан” гэж өөрчилсөн нь зөв үү, хуучнаар нэрлэх үү гэсэн санал асуулгыг хүмүүсийн дунд явуулахаар болжээ. Тэд  өнөөдөр болон маргааш 11.00-17.00 цагийн хооронд “Чингис хаан” талбайн нэрийг нь өөрчилсөн талаар иргэдийн үзэл бодлыг сонсож, гарын үсэг цуглуулах юм байна. Тэд “Талбайн нэрийг зориудаар өөрчилсөн нь их жанжин Д.Сүхбаатарын түүхэнд гүйцэтгэсэн үүргийг бүдгэрүүлэх гэсэн зорилготой. Жанжин Д.Сүхбаатарын байгуулсан гавъяаг монголчууд бид мартах учиргүй” гэж хэлж байгаа юм.