Угсраа автобус, смарт карттай сэтгүүлчдийн аялал зохион байгуулагдлаа. Сэтгүүлчид өнөөдөр  Офицеруудын ордноос төв зам дагуу маршрутаар угсраа автобусаар зорчиж Таваншар хүртэлх аялалыг хийлээ.   Энэ үеэр сэтгүүлчдэд  нийслэлийн холбогдох албаныхан нийтийн тээврийн шинэчлэлт, шинэ чиглэл, маршрут, смарт картын асуудлаар мэдээлэл өгсөн юм.

Замын цагдаагийн газар, “Смарт” ХХК зэрэг  газраас ч  энэхүү ажиллагаанд идэвхитэй оролцож байлаа.

Ингээд "Улаанбаатар смарт карт" ХХК ийн гүйцэтгэх захирал Б Мөнхболортой ярилцлаа.

-Нийтийн тээвэр цахим картад шилжээд хэсэг хугацаа өнгөрлөө. Хэр ахицтай байна ?

-Өнөөдрийн байдлаар төсөл хэрэгжээд сар арай хүрээгүй байна. Өнгөрсөн баасан гарагт ирсэн мэдээллээр 240 мянган иргэн картаа аваад үйлчлүүлж байгаа. Үүнээс 70 гаруй мянга нь ахмадууд байна. 9000 орчим сурагч бий.

-Карт цэнэглэх хичнээн цэгүүд ажиллаж байна вэ?

-370 орчим цэг картаа цэнэглэж, зарж үйлчилж байна.

-Картыг авахдаа 3600 төгрөгөөр авч байгаа. Үнэгүй болгох асуудал ч яригдаж байгаа гэсэн?

-Инфляци өссөнөөр өнөөдөр 3600 төгрөг өндөр тусч байна.  Уг нь үйлдвэрээс 1.5 доллараар гарч байгаа. Үүн дээр гааль, татвар гээд картын өртөг шингэсэн үнэ нь 3600 болсон. Энэ нь бусад орнуудтай харьцуулахад хямд байгаа гэж хэлж болно.

Ерөнхийдөө  “Дата карт” компанийн хамгийн сүүлийн үеийн хэвлэх машин  манай компанид удахгүй ирнэ. Тэгэхээр Монголдоо бүх төрлийн цахим картыг үйлдвэрлэдэг болно. Тэгэхээр үйлдвэрлэлийн өртөг буурна гэж үзэж байна.

-Нууцлалын кодны асуудлыг хэрхэн шийдэж байгаа вэ?

-Манай дээр оюутан, ахмад, хөгжийн бэрхшээлтэй иргэдийн бүх бүртгэл байдаг. Тэгэхээр эдгээр хүмүүсийн хаясан карт дахин сэргээгдэх боломжтой. Харин бусад иргэдийн картыг дахин сэргээх боломжтой байгаа.

-Сургуулийн насны хүүхдүүдийн асуудлыг яах вэ?

-Одоогоор 9000 орчим сурагч картаа авчихсан байна. Харин карт захиалсан сурагчид тухайн картыг захиалсан газартаа очиж цахим үнэмлэхээ үзүүлээд тохируулга хийлгэж картаа авна. Ингэснээр 200 төгрөгөөр зорчиж явна.

-Дамжин суух асуудал багагүй маргаантай байна. Иргэдийн хувьд ч бухимдалтай байна?

-Дамжин суултан дээр бүртгэл явуулах ажил чухал байгаа. Иргэдийн хувьд картаа орохдоо, бас буухдаа уншуулж байгаа. Харин буухдаа уншуулж байгаа явдал нь бүртгэл явуулахад нөлөөлж байгаа. Өөрөөр хэлбэл, ингэж бүртгэл явуулснаар зорчигчдын хэдэн хувь нь дамжин сууж байгааг хянаж байна.  Энэ бүхнийг харж тооцоолсны эцэст  зохицуулалт хийгдэнэ.  30 минутад үнэгүй явах асуудал сая яригдсан ч шууд үнэгүй болгоход их хэмжээний алдагдал хүлээх магадлалтай байгаа. Тиймээс хэсэг хугацаанд иргэд 500 төгрөгөөр зорчиж байгаад тоо бүртгэл тодорхой болмогц хөнгөлөлт үзүүлэх асуудал яригдана.

-Бэлэн мөнгөөр зорчиж байгаа иргэдийн хувьд асуудал дагуулсаар байна. Энэ дээр?

-Бэлэн мөнгөөр зорчиж байгаа иргэд мөнгөө дутуу хийх, хийхгүй орох зэрэг асуудлууд гаргаж байгаа.  Тиймээс иргэд 100 хувь карт руу шилжих чухал байна.  Ингэснээр дамжин суух асуудлыг  ч хөнгөлөх боломжтой болж, хэн хэнийгээ хохирол чирэгдэлгүй болгох талтай.  

-Оюутнуудын картны асуудлыг эртхэн шийдэхгүй бол цаг хугацаа нь дөхөж байна?

-Манай компанийн зүгээс оюутнуудад тараах 113 мянган карт яг одоо бэлэн болчихсон байж байна.  Оюутны холбооныхныг сургачихсан байгаа. Бидэнд оюутнуудын зорчих лимитийг хязгаарлаж өгөх л үлдээд байна. Өөрөөр хэлбэл, оюутнууд өдөрт хоёр эсвэл 4 удаа үнэгүй зорчих уу гэдэг асуудлын шийдвэрийг хүлээж байгаа.

-Иргэдийн хувьд картаа уншуулахгүй, мөнгөө ч өгөхгүй байх тохиолдол гарч байгаа юу?

-Иргэд харьцангуй соёлтой үйлчлүүлж нэг нэгэндээ шаардлага тавьж байгаа. Үүнийг камераар хянаж байгаа ч тухайн иргэн бүрээс мөнгө нэхэх арга байхгүй. Тиймээс иргэдийн цэвэр ухамсрын асуудал л яригдана.

Д.Ундрах /24tsag.mn/