Ашигт малтмалын газраас хайгуулын тусгай зөвшөөрөл хүссэн өргөдлийг өнөөдрөөс онлайнаар бүртгэж эхэлсэн билээ.
Гэсэн ч серверт алдаа гарсан тул бүртгэл зогссон талаар бид мэдээлсэн.
Тэгвэл энэ талаар Ашигт малтмалын газар албан ёсоор мэдээлэл хийв. Уг мэдээлэлд "Дугаар олголт 09:00 цагт эхлэж эхний 51 аж ахуй нэгжийн дугаарыг олгосон боловч 09:02 минутад login серверээс хариу өгөхгүй болж, систем 34 минутын хугацаанд доголдсон.
Асуудлыг тодруулахын тулд Ашигт малтмалын газрын даргын тушаалаар байгуулагдсан ажлын хэсгийг нэн даруй хуралдуулсан. Цахим дугаар олголтын ажлын хэсгийн хуралд цахим дугаар олголтын асуудлаар IERP Consulting компанийн захирал Ц.Бадраа мэдээлэл өгсөн. Ингээд 09:02 минутад сервер хариу өгөхгүй доголдож байгаад 09:36 минутад сервер эргэж сэргэсэн.
Урьдчилсан байдлаар login серверийн ачаалал тооцоолсноос хэт ихэссэнээс болж доголдсон гэж үзсэн. Иймд уг алдааг бүрэн тодруулахаар ажлын хэсэг ажиллаж байгаа бөгөөд шаардлагатай өргөтгөл, тохиргоог гүйцэтгэж, ирэх даваа гаригт наймдугаар сарын 31-ний өдөр дахин өргөдлийн дугаар олгоход бэлэн болгож ажиллаж байна.
Иймээс баазад хадгалагдсан өгөгдлүүдийг тэр даруй нууцлаж, аж ахуй нэгжүүдийн мэдээллийн аюулгүй байдлыгбүрэн хангасан. Өнөөдрийн 51 аж ахуй нэгжийн дугаар олголтыг хүчингүй болгох арга хэмжээ авч, аж ахуй нэгжүүдийн системд хандах эрхийг 1 долоо хоногоор сунгаж байна. Өнөөдрийн дугаар олголтын явцын шалгуулахаар ТЕГ болон тус газрын харьяа Кибер аюулгүй байдлын газар хандсан" гэв.
Энэ үеэр дугаар авахаар бүртгүүлсэн аж ахуй нэгжүүдийн төлөөллөөс ирсэн байсан бөгөөд энэ оны нэгдүгээр сард мөн ийм доголдол гарсан байхад аж ахуй нэгжүүдийн зөвшөөрлийг цуцлаагүй. Харин яагаад өнөөдрийн аж ахуй нэгжүүдийг цуцлав хэмээн үзэж байлаа .Уг асуудалд холбогдох албан тушаалтнууд тодорхой хариулт өгөхөөс татгалзсан юм.
