Дотоодын зах зээлд гурил, гурилан бүтээгдэхүүний нийлүүлэлтийг тогтворжуулах, үнийн өсөлтийг хязгаарлах, хомсдол үүсгэхгүй байх зорилтын хүрээнд ХХААЯ, гурил, гурилан бүтээгдэхүүн үйлдвэрлэгч “Талх чихэр” компани өнөөдөр нэг жилийн хугацаатай хамтран ажиллах санамж бичиг байгууллаа.
Санамж бичигт ХХААЯ Тариалан эрхлэлтийг дэмжих сангаар дамжуулан гурилын үйлдвэрт стандартын шаардлагад нийцсэн хүнсний улаанбуудайг тогтвортой нийлүүлэх харин үйлдвэрлэгч “Талх чихэр” компани нь “Атар” талхны зах зээлийн бөөний худалдааны үнийг 1100 төгрөгөөс хэтрүүлэхгүй байхаар тусгажээ. Түүнчлэн үйлдвэрлэгчийн зүгээс “Атар” талхны үйлдвэрлэлийн талаархи болон зах зээлд нийлүүлсэн талхны үнэ, хэмжээний талаарх мэдээллийг сар бүр нэгтгэн салбарын яаманд мэдээллэх аж.
“Талх чихэр” компаний гүйцэтгэх захирал М.Базар-Ууган ярихдаа, “Манай компанийн зүгээс салбарын яамныхаа бодлого шийдвэрийг дэмжих, хэрэглэгчдийнхээ эрх ашиг, худалдан авах чадварыг бодолцохын зэрэгцээ үйлдвэрийн гол бүтээгдэхүүн болох гурилыг тогтвортой үнээр тээрэмдэж, чанартай буудайг нийлүүлэхээр тохиролцсны үндсэн дээр “Атар” талхыг 1100 төгрөгөөс дээш үнээр борлуулахгүй байхаар тусгалаа. Талх үйлдвэрлэхэд гурилын чанар, цавуулаг маш чухал бөгөөд цавуулгийн хэмжээ 28 хувиас дээш байх шаардлагатай” гэв.