Жил бүр Засгийн газрын яамд “Нээлттэй хаалганы өдөрлөг” зохион байгуулж салбарынхаа үйл ажиллагааг нийтэд сурталчилдаг уламжлалтай. Хууль зүйн яам, түүний харъяа агентлагуудын “Нээлттэй хаалганы өдөр” энэ өдрүүдэд зохион байгуулагдаж байна.

Өдөрлөгийг энэ жил дүүрэг бүрт зохион байгуулах бөгөөд өнөөдөр Баянгол дүүрэгт боллоо. Хууль зүйн яамны мэргэжилтнүүд болон дүүргийн удирдлага харъяа агентлаг, газрын дарга нар иргэдэд үзүүлж буй үйлчилгээ болон байгууллагуудын үйл ажиллагааг танилцуулж үйл ажиллагааг эхлүүлсэн юм.

Энэ өдөр агентлагууд чиг үүргийнхээ дагуу хийж буй ажил, үйл ажиллагааныхаа талаар иргэдэд  мэдээлэл өгөхөөс гадна зарим  үйлчилгээнүүдийг шуурхай үзүүллээ. Тухайлбал, Хил хамгаалах ерөнхий газраас хилийн бүс зурваст нэвтрэх зөвшөөрөл олгож, байгууллагынхаа түүхэн танилцуулгыг хийж, гэрээт хилчин, байгууллагын хүний нөөцийн бүртгэлтэй холбоотой зарим үйлчилгээг нэг цэгээс шуурхай үзүүлсэн байна.

Хил хамгаалах албанд гэрээтээр алба хаах сонирхолтой залуус энэ үеэр мэдээлэл авч бүртгүүлж байлаа. Мөн Цагдаагийн ерөнхий газар, УБЕГ, Архивын ерөнхий газар, Тахарын ерөнхий газар зэрэг байгууллагууд иргэдээс өргөдөл гомдлыг хүлээн авч, газар дээр нь зарим асуудлыг шийдвэрлэн ажиллаж байна.

Нээлттэй хаалганы өдөр маргааш Сонгинохайрхан дүүрэг дэх Соёмбо кино театрын өмнөх талбайд үргэлжинэ.