Халх голын сав орчмын 500 мянган га газарт эдийн засгийн чөлөөт бүс байгуулах шийдвэрийг Засгийн газар, УИХ-аас гаргасан. Эдийн засгийн чөлөөт бүс байгуулахтай холбогдуулан тус бүс нутагт  их хэмжээний газрыг гадны иргэдэд эзэмшүүлэх гэж байна цаашлаад Буйр нуур орчмын газрыг талхалж дуусгах нь гэх мэдээлэл тархаад буй.

Улсын их хурал "Халх гол" чөлөөт бүс байгуулах тухай тогтоолоо батлахдаа иргэдийн  саналыг тусгаагүй. Мөн энэ тухай ямар ч мэдээлэл өгөөгүй нь Монгол Улсын Үндсэн хуулийн 16.17-р зүйл буюу төр, түүний байгууллагаас хууль ёсоор тусгайлан хамгаалбал зохих нууцад хамаарахгүй асуудлаар мэдээлэл хайх, хүлээн авах эрхтэй гэсэн зэрэг Үндсэн хууль, Газрын тухай хууль, Үндэсний аюулгүй байдлын тухай хуулийн хэд хэдэн зүйл заалтыг зөрчсөн гэж үзэн, нутгийн иргэдийн төлөөлөл Үндсэн хуулийн цэцэд хандаад байгаа юм. Мөн хууль зөрчин тогтоолыг баталгаажуулан гарын үсэг зурсан Улсын их хурлын дарга З.Энхболд, Хүнс хөдөө аж ахуйн сайд Р.Бурмаа нарыг албан тушаалаа урвуулан ашигласан байж болзошгүй гэх үндэслэлээр Авлигатай тэмцэх газар, Тагнуулын ерөнхий газарт хандан шалгуулахаар болсон юм.

Ямартай ч Халх гол орчмын газрыг эдийн засгийн чөлөөт бүс болгох шийдвэрийг байгаль орчин хамгаалах ТББ-ууд болон улс төрийн зарим хүчнүүд эрс эсэргүүцэж байна. Өнөөдөр л гэхэд “Халх голоо аваръя” нэртэй түр штаб байгуулагджээ. Уг штабынхан Халх голыг чөлөөт бүс болгохын эсрэг тэмцэх юм байна. Тэд иргэд, олон нийтийг ч өөрсдийнхөө ажилд татан оролцуулах хүсэлтэй байгаа аж. Тус түр штаб нь Гурван гал худалдааны төвийн зугаан давхарт байрлаж байгаа юм байна. Энэ талаар мэдээлэл авч санал хүсэлтээ илэрхийлэхийг хүсвэл 95091195 дугаарт залгахыг тус штабаас олон нийтэд хандан уриаллаа.

Д.Ундрах