Хууль бусаар бэлтгэсэн их хэмжээний самар хадгалж байсныг илрүүлжээ.

Тодруулбал, Баянгол дүүргийн 20 дугаар хорооны нутаг дэвсгэрт байрлах “Ви Си” ХХК-ийн хашаанд “Тэнүүн зоргол” хоршоо “Ойн тухай” хууль зөрчин иргэдээс хууль бусаар бэлтгэсэн 60 орчим тонн хуш модны самар худалдан авч нөөцөлж байсныг Нийслэлийн Мэргэжлийн Хяналтын газрын байцаагч нар шалгалтаар илрүүлжээ.

Тус асуудлыг Улсын мөрдөн байцаах газартай хамтарч үргэлжлүүлэн шалгаж байгаа аж.
 

Хуш модны самрыг тухайн оны 10 дугаар сарын 15-наас дараа оны 3 дугаар сарын 10-ны өдрийн хооронд түүж бэлтгэх нь ёстой байдаг аж. Гэтэл иргэд самрыг хууль бусаар их хэмжээгээр түүж, бэлтгэх зөрчил илэрсээр байгаа юм.

Ер нь болц гүйцээгүй түүхий хуш модны самрыг түүж хэрэглэх нь бохир ариун цэврийн шаардлага хангаагүй, технологи зөрчиж түүхийгээр түүснээр хүнээс хүнд халдварлах гэдэсний болон шар өвчин гарах, тархах магадлалтай юм.

Түүнчлэн намрын хуурайшилтай үед анхаарал болгоомжгүйгээс ой, хээрийн түймэр гаргах, зохих зөвшөөрөлгүйгээр, хүчээр модыг нь түнших буюу муна хэлбэртэй зүйлээр цохих нь модыг гэмтээх сэргэн ургах чадварыг муудахад хүргэдэг учир зөвшөөрөгдсөн хугацаанд хууль журмын дагуу түүж хэрэглэхийг мэргэжлийн байгууллагаас анхааруулж байна.