МҮЭХ-оос даваа гаригт жагсаал зохион байгуулахаар болжээ. Өнгөрсөн нэгдүгээр сард байгуулсан Хөдөлмөр, нийгмийн зөвшилцдийн гурван талт хэлэлцээрт тусгагдсан олон ажлыг Засгийн газар хийгээгүй учраас тэд ийнхүү жагсахаар болсон байна.

Энэ талаар тус холбооны дэд ерөнхийлөгч С.Эрдэнэбат ярихдаа “Бага орлоготой төрийн албан хаагчдын цалинг өнгөрсөн тавдугаар сарын 1-ний өдрөөс нэмнэ гэж тохирсон. Одоо хүртэл нэмсэнгүй. Тиймээс Засгийн газар энэ амлалтаа биелүүл гэдэг шаардлага тавьж байна. Эдийн засаг хүндэрсэн үед цалин нэмэх шаарддагагүй гэж ойрын үед ярих боллоо. Гэтэл үүнийг хэлэлцээрийн үеэр яриад тохирсон. Ам.долларын ханш, бараа бүтээгдэхүүний үнэ өсөж байгаа үед иргэдийн худалдан авах чадварыг бууруулахгүйн тулд цалин нэмэх хэрэгтэй. Мөн ойрын үед цахилгааны үнэ, их, дээд сургуулиудын сургалтын төлбөрийг нэмлээ. Иргэдийн амьжиргаа муудаж байхад төрөөс зохицуулдаг бараа бүтээгдэхүүний үнийг нэмэх нь цагаа олоогүй шийдвэр гэж МҮЭХ үзэж байгаа. Үүнээс гадна хүн амын орлогын албан татварыг хөнгөлөх хэрэгтэй. Мөн хэлэлцээрийн үеэр хөдөлмөрийн хөлсний доод хэмжээтэй тэнцэх орлогыг татвараас чөлөөлнө гэж тохирсон. Гэтэл энэ хуулийг одоо хүртэл УИХ-д өргөн бариагүй. Уг нь эдийн засгийн өсөлт нь саарсан олон оронд энэ аргыг хэрэглэдэг. Тиймээс бид энэ шаарддагаа Засгийн газарт хүргүүлнэ” гэлээ.

Тэрбээр мөн Засгийн газраас цахилгааны үнийг зөвшилцөж байж нэмэх ёстой байсан гэсэн байр суурийг илэрхийллээ.

Т.Сар