Өнгөрсөн долдугаар сараас “ХОГ Bucket Challenge” аян эхэлж оролцогчид нь найз нөхөд, төрийн албан хаагчдыг хог цэвэрлээд, 3 хүнийг хог түүхийг уриалдаг болсон. Тэгвэл “ХОГ Bucket Challenge”-ийг “Вагнер Ази” групп уул уурхайн байгууллагуудын дунд өрнүүлэх санаачлага гаргалаа.

“Вагнер Ази” компанийн 150 гаруй ажилтан гэр бүл, үр хүүхдүүдийн хамтаар өнгөрсөн бямба гарагт хог түүсэн байна. Тэд Маршалын гүүрнээс “Sky Resort” хүртэл зам дагуух болон голын эрэг орчмын хогийг түүж цэвэрлэсэн байна.

Хог цэвэрлэх арга хэмжээг тус компанийн Нийгмийн Хариуцлагын Хороо зохион байгуулсан бөгөөд “ХОГ Bucket Challenge”-д нэгэн салбарт өрсөлдөж буй уул уурхайн компаниудыг уриаллаа.

“Хот хогийн сав биш, Ухамсартай хотын иргэд байцгаая” хэмээн уриалсан “Вагнер Ази”-ийн хамт олон “Оюу Толгой” ХХК, “Уул Уурхайн Үндэсний Олборлогч” ХХК, “Leighton” ХХК-ийг “ХОГ Bucket Challenge”-д нэгдэхийг урьжээ. Эдгээр байгууллагууд хоёр долоо хоногийн дотор хог цэвэрлэх үйл ажиллагааг зохион байгуулах бөгөөд дахин 3 уул уурхайн компанийг энэ аянд уриалах ёстой юм.

Г.Үжин