Өмнөговь аймгийн төв буюу Даланзадгад сумын бүтээн байгуулалт, үндэсний үйлдвэрлэлттэй танилцахын сацуу шилдэг татвар төлөгч компани болох “Мэндийн говь”-ийг зорьж, ажлын явцтай нь танилцлаа. Энэ үеэр тус компанийн дэд захирал У.Энхбаяраас зарим зүйлийг тодрууллаа.
-Танай компани нутгийнхаа бетон зуурмагны хэрэгцээний хэдэн хувийг хангаж чаддаг вэ?
-Манай компанийн хувьд дотооддоо лаборторийн шинжилгээ хийж түүхий эд материалаа угааж ашигладгаараа онцлог. Ийм маягаар ашиглах нь илүү чанартай болгож өгдөг.
Орон нутгийнхаа бетон зуурмагны 50 хувийг хангадаг. Мөн орон нутагтаа 2-3 салбараар үйл ажиллагаагаа явуулж байгааг дэмжиж манай байгууллагыг шилдэг татвар төлөгчөөр шалгаруулсан. Компани маань 2000 оноос үйл ажиллагаа явуулж эхэлсэн.
-Бүтээн байгуулалтаасаа дурдахгүй юу?
-Орон нутагтаа 18 айл, 40 айлын 5 давхар 2 орон сууц, Өмнөговь аймгийн Номгон суманд 8 айлын 2 блок орон сууцыг барьж гүйцэтгэсэн. Цаашлаад орон нутгийн бүхий л барилгын компаниудын цутгалын ажлыг авч явж байгаа. Манай компани байгуулагдсан цагаасаа хойш 20 гаруй м.куб бетон зуурмаг үйлдвэрлэж гаргасан байгаа.
-Үйлдвэрийн хүчин чадлын хувьд?
-Цагт 60 м.куб зуурмаг үйлдвэрлэн гаргах хүчин чадалтай.
-Сүүлийн үед барилга бүтээн байгуулалт нэмэгдэж байна. Зах зээл, эрэлт нийлүүлэлт сайн байна уу?
-Зах зээлийн хувьд энэ жил харьцангуй багассан. Ер нь аймгийн хэмжээнд нийлүүлэлт боломжийн байгаа.
-Үйлдвэрлэлийн түүхий эдийн тухайд?
-Цементээ БНХАУ-аас оруулж ирдэг. Бусад бүтээгдэхүүнүүдээ орон нутгаасаа татаж ашигладаг. Урд хөрштэй хил залгаа болохоор цементээ тээвэрлэхэд хямд тусдаг.
"Манай компани 2012 онд гурван хүний бүрэлдэхүүнтэйгээр анх удаа үйл ажиллагаагаа явуулж эхэлсэн. 2013 оноос "Оюутолгой" компанитай хамтран ажиллаад нэлээдгүй хугацааг өнгөрөөж байгаа. Манай компани өнөөдрийн байдлаар 50-иад ажилчинтай болтлоо өргөжсөн. Ажилчдынхаа 90-иэд хувийг сум, орон нутгаасаа бүрдүүлсэн. Компани маань дөрвөн чиглэлээр үйл ажиллагаа явуулдагын дотор зам усалгаа, цэвэршүүлэх шугамын үйл ажиллагаа багтдаг. Аймгийнхаа хэмжээнд тэргүүний татвар төлөгч болсон. Жилдээ 300 гаруй сая төгрөгний татвар төлдөг. Улмаар улс эх орондоо үнэтэй хувь нэмрээ оруулсан гэж шилдэг татвар төлөгчөөр удаа дараа шалгарсан. Сум орон нутгийнхаа хэмжээнд манай компани ахмадуудтайгаа тулж ажилладаг. Дэмжлэг туслалцааг үзүүлдэг. Цаашлаад ерөнхий боловсролын сургуулийн хүүхдүүдэд дэмжлэг туслалцаа үзүүлж ажилладаг. Үүнийхээ хүрээнд Өмнөговь аймгийн Ханбогд сумын нэрэмжит олон шагналын эзэн болсон. Оюутолгойн бүтээн байгуулалт өрнөж, хөгжил дэвшил сайжирсаар байна гэдэг сум орон нутгийн ард иргэдийн амьдрал дээшилж байгаа юм. Манай компанийн хувьд сум орон нутгаа дэмжих үүднээс өнгөрсөн жил сумынхаа төвд "Хан гүрд" автосервис ажиллуулж эхэлсэн" гэв.
Д.Ундрах /24tsag.mn/
