Эх орноо 20 хоногийн хугацаанд нар зөв тойрох зорилго тавьж, энэ сарын 10-нд аялалдаа гарсан "I love Mongolia" түншлэл болон хэвлэл мэдээллийн хамт олон хонгор нутагт ажиллалаа.

Жишиг аймаг болох зорилт тавьсан баянхонгорчууд энэ онд бүтээн байгуулалтын хэд, хэдэн томоохон ажлыг өрнүүлжээ. Хамгийн наад зах нь л гэхэд, тус аймгийн хувьд агаарын бохирдол, тоосжилтоороо улсдаа дээгүүр бичигддэг. Эл асуудлыг шийдвэрлэж, иргэдээ эрүүл, эко орчинд ажиллаж, амьдрах нөхцөл бололцоогоор хангах үүднээс төвийн баруун, зүүн хойд хэсгээр 50 метрийн өргөнтэй 5.6 км үргэлжлэх ойн зурвасыг байгуулжээ.

Энэхүү ногоон зурваст улиас, хайлаас зэрэг төрөл бүрийн жимсний мод болох 26 мянга гаруй суулгацыг төрийн албан хаагчдын хүчээр тарьжээ. Ингэхдээ усалгааны системийг байрлуулан, хайс хамгаалалтыг хийсэн байна. Үүнээс гадна дээрх төрөл бүрийн мод, суулгацыг усалж, арчлах зорилгоор "Чандмань Баянхонгор" компанийн хамт олон 120 тоннын хүчин чадалтай усан сан, услалтын системийг барих ажилдаа ханьцуй шамлан оржээ.

Өөрөөр хэлбэл, аймгийн төвийг тойруулан байгуулсан ногоон зурвас дахь услах хоолой руу шахагдах ус эл усан санд төвлөрөх юм.

Одоогоор ажлын явц 80 хувьтай явж байгаа бөгөөд удахгүй ашиглалтад орно. Орон нутгийн өмчит үйлдвэрийн газрын дарга С.Батдорж хэлэхдээ "Баянхонгор сумын хойд талаас баруун хэсгийг тойрсон 5.6 км ойн зурвасыг өнгөрсөн жилд барьсан. Энд ойролцоогоор 26 мянга гаруй модыг тарьж, ургуулсан. Энэхүү ойн зурвасын усалгааны системийг хувийн аж ахуйн нэгжүүд хамтран хийж, гүйцэтгэж байна. Ажлын явц 80 хувьтай байна. Ойролцоогоор 80 км-ийн урттай шугам хоолой угсарч, дуслын усан системийг байрлуулахаар төлөвлөсөн. Энэ бол аймгийн томоохон бүтээн байгуулалтын ажлыг нэг яах аргагүй мөн юм" гэв. Тэрбээр үргэлжүүлэн "Дээрх бүтээн байгуулалтын ажилд нийт 500 гаруй сая төгрөг төсөвлөсөн. Харин орон нутгийн компаниуд хоорондоо ярилцаад хамгийн бага зардлаар хийж гүйцэтгэж байна. Өөрөөр хэлбэл, ашиг хараагүй. Манай компанийн хувьд 120 орчим сая төгрөгөөр услалтын нуураас хоёр тийшээ мод руугаа явах шугамын ажлыг нь хийж байгаа. Харин "Чандмань Баянхонгор" компани хиймэл нуурыг усжуулах зэрэг бусад ажлыг нь хийж байна. Хөрөнгө, санхүүгийн асуудлыг нь шийдсэн" хэмээн ярилаа.

Аймгийн Засаг Даргын тамгын газрын хөгжлийн бодлогын хэлтсийн дарга Б.Гантулгатай: 3.7 тэрбумын өртгөөр 10 км замыг тавьж байна

Үүний дараа "I love Mongolia" түншлэл болон хэвлэл мэдээллийн багийн хамт олон аймгаа тойруулан тавьж буй 10 км урт замын бүтээн байгуулалтын ажилтай танилцсан юм. Энэ үеэр тус аймгийн Аймгийн Засаг Даргын тамгын газрын хөгжлийн бодлогын хэлтсийн дарга Б.Гантулгаас дараах зүйлийг тодрууллаа.

-Баянхонгор аймагт зам, засвартай холбоотой бүтээн байгуулалтын хэд, хэдэн томоохон ажил өрнөж байна. Энэ онд л гэхэд шинээр хэдэн км зам шинээр тавихаар төлөвлөсөн бэ?
-Нийт 14 км урт хатуужилттай зам байдаг. Үүнээс аймгийн төв замыг Орон нутгийн хөгжлийн сангийн хөрөнгө оруулалтаар 5.6 км замыг бүрэн шинэчилж, шинээр ус зайлуулах хоолойг хийж, гүйцэтгсэн. Энэ нь ус зайлуулах хоолойтой барьсан анхны зам болсон. Яг одоогийн байдлаар бол гэр хорооллыг холбосон 10 км замыг тавьж байна. Ажлын явц 70 орчим хувьтай байна. Замын суурь болон далангийн ажлыг бүрэн хийж дуусгасан.

-Хэчнээн төгрөгийн санхүүжилтээр барьж байгаа юм бэ?
-Зөвхөн замыг л гэхэд 3.3 тэрбум төгрөгийн өртгөөр барьж байгаа. Гэрэлтүүлэг болон явган хүнийхээ замтай нийлээд нийт 3.7 тэрбум төгрөг.

-Хэзээ ашиглалтад орох вэ?
-Энэ оны аравдугаар сардаа багтааж, ашиглалтад оруулах зорилготой байгаа.    

-Замын ажлыг яг ямар компани гүйцэтгэж байгаа юм бэ?
-"Монгол зам" группын хамт олон нийж гүйцэтгэж байна. Бетонон зам асфалтан замаас ялгаатай л даа. Наад зах нь өртгийн хувьд хамаагүй хямд. Насжилтын хувьд өндөр. Гэхдээ энэхүү 10 км замыг гэр хороололд тавьж байгаагаараа онцлогтой.  

Д.Ундрах /24tsag.mn/