Нийслэлийн иргэдийн төлөөлөгчдийн хурлын төлөөлөгчид их хэмжээний мөнгөн урамшуулал авдаг тухай мэдээлэл цацагдсан. Тодруулбал, НИТХ-ын төлөөлөгчид улирал бүр 13.5 сая төгрөгийн урамшуулал авдаг бөгөөд 2015 оны эхний хоёр улирлын урамшуулал болох 27 сая төгрөгийг долоодугаар сарын 3-ны өдөр тус бүртээ авсан аж.

Тэгвэл дүүргийн иргэдийн төлөөлөгчид мөн адил урамшуулал авдаг юм байна. Тодруулбал, Нийслэлийн есөн дүүргээс сонгогдсон иргэдийн хурлын нэг төлөөлөгч урамшуулал гэж улиралд таван сая төгрөг, жилд 20 сая төгрөгийг авдаг аж.

Харин энэхүү урамшууллаасаа Баянзүрх дүүргийн иргэдийн төлөөлөгчид татгалзах санал гаргажээ. Энэ талаар тус дүүргийн Эдийн засаг, хөгжлийн бодлого хариуцсан засаг даргын орлогч С.Гантулгаас тодруулахад, “Манай төлөөлөгчид урамшууллаасаа татгалзах саналыг гаргаад 2015 оны нэгдүгээр сарын 1-ний өдрөөс мөрдлөг болгон хэрэгжүүлж байна. Баянзүрх дүүргийн тухайд нийт 41 төлөөлөгчтэй. 41 төлөөлөгч тус бүр жилд 20 сая төгрөгийн урамшууллыг өмнө нь авдаг байснаа зогсоосон гэсэн үг. Жилийн дүнгээр нь бодоод үзвэл нийтдээ 820 сая төгрөг болж байгаа юм. Бидний зүгээс харин энэхүү мөнгөөрөө дүүргийнхээ нийт 28 хороонд Иргэний танхимыг шинээр байгуулсан” гэлээ.