Өмнөговь аймгийн ИТХ-ын “Зарим газрыг орон нутгийн тусгай хамгаалалтад авах тухай” 2010 оны арванхоёрдугаар сарын 24-ний 7/8 дугаар тогтоолоор Ханхонгор сумын нутаг, Балгасан голын Улаан нуур орчмын 101226 га талбай газрыг орон нутгийн тусгай хамгаалалтад авсан аж. Ийнхүү авахад нь “Пибоди Винсвэй ресорсес” компанийн хайгуул хийж байсан XV-114688, XV-13692 дугаарын тусгай зөвшөөрөлтэй талбай багтсан юм байна. Үүнээс үүдээд тус компанийнхан Ашигт малтмалын тухай хуулийн 14.4 дэх хэсгийг үндэслэн Өмнөговь аймгийн ИТХ-аас гурван тэрбум гаруй төгрөг нөхөн төлбөрт гаргуулахаар нэхэмжилжээ. АМГ-аас тус компанид олгох нөхөн олговрын хэмжээг 3.182.739.000 төгрөгөөр тогтоосон аж.

Харин Өмнөговь аймгийн ИТХ-ын гишүүд "Тус аймгийн нутаг дэвсгэрийн 40 шахам хувь нь ашигт малтмалын лицензтэй. Говь нутгийн цаг уурын нөхцөл хуурай, байгаль орчин эмзэг тогтоцтой, дэлхийн цаг агаарын өөрчлөлтөд сөргөөр нөлөөлж байдгийн дээр уул, уурхайн замбараагүй үйл ажиллагааны нөлөөллөөс экологийн тэнцвэрт харьцаа алдагдаж хуурайших, цөлжих явц улам эрчимжиж байгаа нь иргэдийн эрүүл аюулгүй орчинд амьдрах эрх зөрчигдөж дахин давтагдашгүй байгалийн үзэсгэлэнт газрууд устах, говийн бүсийн усны нөөц багасах аюул нүүрлэж байгаа учраас орон нутгийн ард иргэд, төр засгийн байгууллагын зүгээс байгалийн үзэсгэлэнт газраа хамгаалахын тулд уг газрыг хамгаалалтад авах тогтоол гаргасан хэмээн тайлбарлаж байгаа юм.

Өмнөговь аймаг дахь Сум дундын шүүх ИТХ-аас дээрх мөнгийг гаргуулан “Пибоди Винсвэй ресорсес” компанид олгох шийдвэр гаргасан ч давж заалдах шатны шүүх анхан шатны шүүхээр дахин хэлэлцүүлэх болжээ. Харин нэхэмжлэгч компани давж заалдах шатны шүүхийн магадлалыг эсэргүүцэж Дээд шүүхэд хандсан аж.