О.Магнайгийн дараа Шударга өрсөлдөөн хэрэглэгчийн төлөө газрын даргаар сонгогдсон Т.Аюурсайханыг сонгуулийн шоугаа эхэлсэн үү гэх яриа гадуур жиг жуг хийж байна. ШӨХТГ-ын даргаар ирмэгцээ цомхотгол хийж багагүй хэл ам гаргасан тэрбээр олон сайхан зүйлийг хэрэглэгчдэд амалж байсныг та бүхэн санаж байгаа биз ээ.

Тодруулбал, манай байгууллага хуульд заасан үүргийнхээ дагуу хэрэглэгчийн эрхийг хамгаалах, шударга өрсөлдөөний нөхцлийг Монгол Улсын зах зээлд бүрдүүлэхэд бодлогын түвшинд ахиц дэвшил гаргахын төлөө ажиллах ёстой  гэсээр гарч ирсэн түүнийг цөөнхийн талд үйлчилж, олон иргэн хохирч байгаа асуудлуудыг нэг л хойш тавиад байна уу даа гэж харах хэсэг бүлэг байгаа юм.

Учир нь тэрбээр дотоодынхоо асуудлыг шийдэж чадаагүй хэрнээ ОХУ, БНХАУ-ын асуудалд хэтэрхий их анхаарлаа хандуулаад байгаа нь зарим үйлдлээс нь ажиглагдаж байгаа нь нууц биш.

Энэ нь байгууллагын гадаад харилцааг бэхжүүлэх нэг зорилго байж болох ч ШӨХТГ-ын хүрч үйлчлэх ёстой олон шударга бус зүйл нийгэмд хүрээгээ тэлсээр байгаа энэ үед арай л авцалдаагүй ажлуудад "хошуу дүрж" яваа юм болов уу гэсэн сэдлийг төрүүлж байна.

Юутай ч ирэх сонгуульд ШӨХТГ-ын хуучин болоод одоогийн дарга нарыг нэр дэвшиж, өрсөлдөх төлөвтэй байгаа гэдгийг олон түмэн харж байгаа. Тиймээс ажлын онцлог нөхцөл, албан тушаалаараа тахалж шоу хийдэг хуучраагүй "моод" -ыг Т.Аюурсайхан ашиглаж эхэлсэн үү гэх хардлага нийгэмд ийн бий болоод байна.

Өнгөрсөн удаад БНХАУ-ын Аж үйлдвэр, худалдааны засаг захиргааны газартай хамтын ажиллагаатай байж Хэрэглэгчид үйлчлэх төвийг Замын-Үүдэд  нээх ажиллагааг зохион байгуулна гэж байсан ч үйл ажиллагаа нь ил тод бус, иргэдийн хандлага, хандалт хэр байгаа нь ч мэдэгдэхгүй сул  газар болж хувирсан.  Харин өдгөө Т.Аюурсайхан тэргүүтэй төлөөлөгчид Бүгд Найрамдах Буриад Улсын Улаан-Үд хот дахь ОХУ-ын Монополийн эсрэг холбооны алба болон Иргэдийн сайн сайхан байдал ба хэрэглэгчийн эрхийг хамгаалах улсын албанд ажлын айлчлал хийсэн нь бас л хэрэглэгчдийг бухимдлыг төрүүлээд авчээ.

Албан тушаалаараа тахалж шоу хийдэг хуучраагүй "моод" -ыг Т.Аюурсайхан ашиглаж эхэлсэн үү

Ингэхдээ хойд хөршид зорчих иргэд, бизнес эрхлэгчийнхээ эрх ашгийг хамгаалах, шударгаар бизнес эрхлэх нөхцөлийг нь бүрдүүлэх асуудлыг Т.Аюурсайхан холбогдох байгууллагуудын удирдлагуудтай ярилцаж тохиролцсон гэнэ.  Өөрөөр хэлбэл, хойд хөршид зорчиж буй иргэд эрх нь зөрчигдвөл ОХУ-ын Иргэдийн сайн сайхан байдал ба хэрэглэгчийн эрхийг хамгаалах улсын албаны тухайн орон нутаг дахь салбарт хандаж, тус байгуулагын зүгээс манай улсын иргэдийн гомдлыг түргэн шуурхай шийдвэрлэж байхаар болжээ.  Тэгвэл үүнийг сонгуулийн шоу мэтээр харж байгаа иргэд цөөнгүй байгааг дээр дурдсан билээ. Харин зарим иргэдийн хувьд Т.Аюурсайхан нар очиж уулзаад л зохицуулагдчихдаг асуудал биш гэдгийг дуу нэгтэй хэлж сууна.

Тэгэхээр энэ бүхнээс харахад ШӨХТГ эхлээд иргэдийнхээ амьдралд ойр, нийгэмд байх ёстой мэтээр тогтсон тэр их шударга бус зүйлсийг халчихаад дараа нь гадаад, дотоод харилцаа гэж явбал хэрэглэгчдийн итгэлийг төрүүлэх нь.

Шударга өрсөлдөөн хэрэглэгчдийн төлөө газар гэдэг утгаараа хэрэглэгчийн талд байх ёстой. Гэтэл тэдний хамар доор өчнөөн олон хэрэглэгчид хохирч, жижиг гэлтгүй бөөн асуудлууд байсаар байхад гадаад харилцаа, хилээр зорчигсдын асуудлыг нэн тэргүүнд тавьж байгаа нь учир мэдэх хүмүүсийн ундууцлыг хүргээд авчээ.

Өөрөөр хэлбэл, кабель, интернет, СӨХ гээд жижиг гэлтгүй луйвар иргэдийн халаасыг тэмтэрсээр байхад гадаад харилцааны асуудал хөндөөд байгааг нь иргэд гайхаж байна.

Хамар дороо байгаа түмэн асуудлыг шийдэхгүй байж  сонгуулиар сэрж баахан шоу хийдэг яам, агентлаг, хурган дарга нарын энэ үйлдлийг олон түмэн андахгүй мэддэг болжээ.

Д.Дуулим