Яг одоогийн байдлаар “Эрдэнэс ТТ” компанийн ажилчид ажил хаяж, суулт зарлаж байна. Тэд яагаад суулт зарлах болсон талаарх мэдээллийг товчхон сийрүүлбэл, Зүүн цанхид олборлолт явуулдаг Австралийн компанийн ажилчид “Эрдэнэс Тавантолгой” компанитай хөдөлмөрийн гэрээ байгуулан ажил үүргээ гүйцэтгэдэг байжээ. Гэтэл “Эрдэнэс Тавантолгой” компанийн зүгээс ажилтнууддаа “Австралийн компани Монголоос гарч оронд нь Хятадын Шинхуа компани орсон. Тиймээс Хятадын компани руу та нарыг шилжүүлсэн” гэж мэдэгджээ. Энэ нь өнөөдөр ажилчдыг ажлаа хаяж суулт хийхэд хүргэсэн байна.

“Эрдэнэс Тавантолгой” компани нь 400 гаруй ажилтантай. Үүнээс олборлох үйл ажиллагаа явуулахад голлох үүргийг гүйцэтгэдэг уурхайн оператор, уулын мастер гээд нийт 200 гаруй ажилтан уг суултад нэгджээ.

Ажилчдын зүгээс “Эрдэнэс Таван толгой” компани хөдөлмөрийн гэрээгээ зөрчсөн гэж үзэж байгаа аж. Тодруулбал, ТУЗ-ийн хурлаараа ажилчдын хөдөлмөрийн гэрээг шууд цуцалж, Хятад компанийн мэдэлд бүрэн шилжүүлжээ. Ингэснээр ажилчдын ажлын байр баталгаагүй болж байна хэмээн ажилчид хэлж байна. Мөн Хөдөлмөрийн гэрээг гүйцэтгэх захиралтай нь хийдэг ч цуцлах шийдвэрийг ТУЗ дангаараа дур мэдэн гүйцэтгэсэн нь буцах хаяг, буух эзэнгүй зүйл болж байна гэлээ.

Энэ талаар компанийн үйлдвэрчний эвлэлийн дарга С.Эрдэнэ “Хамтын гэрээ хийх хэлэлцээрийг тасалдуулсныг эсэргүүцэж суулт зарлаж байна. Бидний мэдэгдлийг хүлээж авахгүй бол олон нийтийг хамарсан эсэргүүцэл болгоно. Тэмцлийн бүх хэлбэрт шилжинэ” гэдгээ мэдэгдэв.

Мөн тэд уг шийдвэрээ эргэж харахыг хүсч байгаа аж. Хятадын компанийг оруулж ирж буйн цаана их хэмжээний мөнгө угаалт байж болзошгүй гэж ажилчид ярьж байна. Одоо Эрдэнэс Тавантолгой компани нь тоног, төхөөрөмж гэх зүйлгүй байгаа бөгөөд энэ нь яваандаа Энержи Ресурс компанид шилжүүлэх гэж буйтай холбоотой байх гэсэн хардлага ажилчдад байгаа аж.

Т.Энхэлээ