Улаанбаатар хотоос Төв аймгийн Мөнгөнморьт сум, Хэнтий аймгийн Бат ширээт сумын Ононгийн халуун рашаан чиглэлд хоёр автомашинтайгаар явж байсан 5 иргэн энэ сарын 10-ны өдөр гараад сураггүй болсон талаар бид мэдээлж байсан.  

Тэгвэл дээрх иргэдийн ар гэрийнхэн өчигдөр нисдэг тэрэг хөлслөн Хэнтий аймгийн Бат ширээт сумаас наана 75 км орчмоос 5 иргэнийг эсэн мэнд олж, 17:00 цагийн орчим нийслэлд буусан байна. Сураггүй болсон иргэдийн нэг автомашиных нь шатахуун дууссан, газар орны хувьд ой, хөвч, шавар намаг, бартаа саад ихтэй байсан учраас хүндрэл үүсч, харилцаа холбоо тасарсан байсан ч ийнхүү олжээ. 
 

Иргэд Онцгой байдлын ерөнхий газарт хандан, эрлийн ажиллагаа зохион байгуулсан Төв аймгийн Онцгой байдлын газар, Аврах тусгай тусгай ангийн албан хаагчдад талархлаа илэрхийлэхийг хүссэн байна.